#xabar #mustaqillik #bayram

 Bugun, 1 sentyabr kuni Makka shahridagi “Al-Ayyam Elite” mehmonxonasida Vatanimiz mustaqilligining 34 yilligi munosabati bilan ayni kunlarda Makkai mukarramada toatu ibodatlar bilan bo‘lib turgan 200 nafardan ziyod ziyoratchilarimiz uchun bayram tadbiri tashkil etildi. Unda Jidda shahridagi bosh konsul Sirojiddin Shamsuddinov, “Haj” va “Umra” bo‘yicha attashe Shuhrat Amoniy, Ishchi guruh vakillari ishtirok etdi.  

An’anaga muvofiq tadbir Qur’on tilovati va xayrli duolar ila boshlandi. Shundan so‘ng mutasaddi vakillarimiz umra safarida bo‘lib turgan hamyurtlarimizni Mustaqillik kuni bilan muborakbod etib, yurtimizda 34 yil davomida amalga oshirilgan xayrli ishlar, xususan, so‘nggi yillarda bo‘y ko‘rsatayotgan keng ko‘lamli islohotlar, erkinlik ne’mati, uni asrab-avaylash va qadrlash barcha yurt farzandlarining burchi ekanini alohida ta’kidlab o‘tishdi.  

Ma’naviy-ma’rifiy uchrashuvda keyingi yillarda barcha sohalar qatori diniy-ma’rifiy sohada ham ulkan o‘zgarishlar ro‘y bergani, jumladan, umra ziyorati bir necha yuz ming nafarga, Haj kvotasi esa 15 ming nafargacha oshirilgani, ularga xizmat ko‘rsatish, mavjud sharoitlar havas qiladigan darajaga ko‘tarilgani, bunga hozirda umra amalini ado etayotgan hamyurtlarimiz bevosita guvoh bo‘layotgani qayd etildi.  

Tadbirda ishtirokchilarni yaxshi tilak va duolar bilan qutlash barobarida bayram shirinliklari ham ulashildi. Ko‘taringki va samimiy ruhda o‘tgan tadbir ziyoratchilarda katta taassurot qoldirdi.  

Alloh taolo mustaqilligimizni abadiy qilsin, yurtimizni tinch va farovon, xalqimizni xotirjam va baxtiyor aylasin! 

O‘zbekiston musulmonlari idorasi Matbuot xizmati