Umar ibn Hattob roziyallohu anhudan rivoyat qilinadi. Rasululloh sollallohu alayhi vasallam: «Kim tahorat olib: “Ashhadu alla ilaha illallohu vahdahu laa shariyka lahu va ashhadu anna Muhammadan 'abduhu va Rasuluhu”, desa, unga jannatning sakkizta eshigi ochilib, xohlaganidan kiraveradi», dedilar (Imom Muslim rivoyati).

Tahoratning badanni tetiklashtirish, chiniqtirish, turli kasalliklar va ruhiy illatlarni bartaraf etishda juda ko'p foydalari bor. Tahoratda ikki qo'lni yuvganda qo'l muskullari, bilaklar harakatlanadi. Og'iz va burunni chayganda jag', qo'l muskullari, elka harakatlanadi. Nafas yo'llari ochiladi.

Boshga mash tortish tahoratning farzlaridan biri qilib belgilanishida ko'p hikmatlar bor. Qo'l barmoqlarini ho'llab mash tortganda boshdagi tomirlar kengayib, og'riqlar yo'qoladi. Kishi o'zida xotirjamlik va rohatni his qiladi.

Bosh og'rig'ining 95 foizida aynan boshdagi tomirlarning siqilishi tufayli og'riq paydo bo'ladi. Boshga va gardanga mash tortish bilan qon aylanishi, asab tizimi faoliyati yaxshilanadi. Bosh og'rig'i yo'qoladi. G'azablanib turgan har qanday kishi tahorat olgach, hovuridan tushadi. Rasululloh sollallohu alayhi vasallam: “Albatta, g'azab shaytondandir. Shayton olovdan yaralgan. Olov suv bilan o'chadi. Agar sizlardan biringiz g'azablansa, tahorat olsin”, deganlar (Imom Abu Dovud rivoyati).

Qarang, bu juda ham oson, ammo savobi ulkan, gunohlarni ketkazuvchi, jannatga etkazuvchi bo'lgan amaldir. Lekin dangasaligimiz, beparvoligimiz oqibatida bunga e'tibor bermaymiz, amal qilmaymiz. Ko'pchiligimiz hatto bilmaymiz ham. Avval bilmasak, endi bilib oldik. Endi bilganimizga amal qilaylik va boshqalarga ham etkazaylik. Zero, Rasululloh sollallohu alayhi vasallamning sunnatlarini yoyilishiga xizmat qilish u zotga bo'lgan muhabbat va ehtiromning yuksak namunasi hisoblanadi. U zot sollallohu alayhi vasallam sunnatlarini aniqlik bilan etkazganlarning haqqiga: “Mening gapimni eshitib, yodlab, singdirib, so'ngra etkazgan odamni Alloh ne'matlantirsin”, deb duo qilganlar (Imom Termiziy rivoyati).

Alloh taolo barchamizga har bir ishda Rasululloh sollallohu alayhi vasallamning sunnatlariga amal qilishimizga tavfiq ato etsin, omiyn!

Davron NURMUHAMMAD