Hayo qilaman
Sufyon ibn Uyayna aytadi: “Bir kuni xalifa Hishom ibn Abdulmalik Ka'baga kirgan edi, u erda Solim ibn Abdullohni ko'rib, “Mendan hojatingizni so'rang”, dedi. Solim: “Men Allohning uyida U Zotdan boshqadan bir narsa so'rashga hayo qilaman”, dedi. Solim Ka'badan chiqqach, “Mana, Ka'badan chiqdingiz, endi hojatingizni so'rang”, dedi. Solim: “Dunyo hojatlaridanmi yoki oxirat hojatlaridanmi?” degan edi, Hishom “Dunyo hojatlaridan”, deb aytdi. Solim ibn Abdulloh: “Men dunyoni uning Egasi bo'lgan Zotdan so'ramadim, endi qanday qilib uning egasi bo'lmagan odamdan so'rayman?” deb, boshqa gapga o'rin qoldirmadi”.
«Solihlar gulshani» asaridan
Xoja Buxoriy madrasasida "Xatmona – 2026" tadbiri o‘tkazildi
Qashqadaryo viloyatidagi Xoja Buxoriy o‘rta maxsus islom ta’lim muassasasida 32-bitiruvchi kurs talabalari uchun bag‘ishlangan "Xatmona–2026" tantanali tadbiri bo‘lib o‘tdi.
Tadbirda O‘zbekiston musulmonlari idorasining Qashqadaryo viloyati bosh imom-xatibi Rahmatillo domla Usmonov, viloyat hokimligi vakillari, muassasa rahbariyati, ustozlar va bitiruvchilar qatnashdi.
Marosimni ta’lim muassasasi mudiri O‘tkir G‘uzarov ochib, yoshlarga ilm va ma’rifat yo‘lida sobitqadamlik tiladi. Shundan so‘ng viloyat bosh imom-xatibi Rahmatillo domla Usmonov so‘zga chiqib, bitiruvchilarga ilm fazilati, ustozga hurmat hamda dinimiz va xalqimiz yo‘lida sidqidildan xizmat qilish mas’uliyati haqida qimmatli nasihatlar qildi.
Tadbir davomida ustozlar va talabalarning dildan suhbatlari, xotiralari tinglandi.
Yakunda ilm yo‘lida alohida o‘rnak ko‘rsatgan bitiruvchilarga esdalik sovg‘alari va tashakkurnomalar topshirildi.
Tantanali marosim xayrli duolar bilan yakunlandi.
Xoja Buxoriy islom ta’lim muassasasi
Matbuot xizmati
