— Halqimiz orasida odamlarning “eshon”, “qoracha” degan toifalari bor. Ota-bobolarimiz: “Eshondan qiz olma, qiz berma”, deb kelishgan. Shu gaplar shariatimizda chindan ham bor-mi?
— Aslida tenglik dinga qarab bo'ladi. Musulmonlarning barchasi bir-birlariga tengdirlar. Ammo jumhur ulamolar nikohdagi tenglikka dindan boshqa nikoh ayblaridan salomat bo'lish, nasab va kasbga o'xshash narsalarni ham qo'shadilar. Chunki, odatda ushbu omillarga e'tibor bermaslik ko'pincha oilaning buzilishiga sabab bo'ladi. Lekin taraflar rozi bo'lsa, nikoh joiz bo'laveradi.
Sizning savolingizda kelgan eshon, qorachalardan qiz olib, qiz berib bo'lmasligi va uning oqibatlari haqidagi gaplar noto'g'ri. Vallohu a'lam!
Muhammad Ayyub HOMIDOV
Bugun, 19 sentyabr kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari juma namozini Toshkent shahri Yakkasaroy tumanidagi "Rakat" jome masjidida ado etdilar.
Muftiy hazratlari juma namozidan oldin yig‘ilgan jamoatga mav’iza qilib berdilar. Musulmonning musulmonga ehtiromi mavzusida qilingan go‘zal suhbat davomida Alloh taolo inson zotini azizu mukarram etib, borliqdagi barcha narsani insonga xizmat qildirib qo‘ygani, shunday ekan, insonlar ham o‘zaro ahl-inoq, mehr-muhabbatli, bir-birlariga doimo yordamchi bo‘lib hayot kechirishlari dinimiz amri ekani eslatib o‘tildi.
Ma’ruza asnosida Qur’oni karim va hadisi shariflar keltirib o‘tildi. Jumladan, mashhur sahobiy Abdulloh ibn Umar roziyallohu anhudan keltirilgan hadisda bunday deyiladi: “Men Rasululloh sollallohu alayhi vasallamning Ka’ba atrofida tavof qilayotganlarini ko‘rdim. U zot Ka’baga qarab bunday der edilar: "Sen va sening hiding qanday ham go‘zal! Sen qanday ulug‘san va sening hurmating qanday buyuk! (Lekin) Muhammadning joni qo‘lida bo‘lgan Zotga qasamki, Alloh nazdida mo‘minning hurmati sening hurmatingdan ham ulug‘dir" (Imom Ibn Moja rivoyati).
Musulmon kishining Alloh nazdidagi hurmati mana shunday baland ekan, o‘zaro hurmat-ehtiromi ham shunga monand bo‘lishi ta’kidlandi. Manfaatli suhbat yakunida butun dunyo musulmonlari, xususan, xalqimizning o‘zaro ahil-inoqligi bundan ham ziyoda bo‘lishini so‘rab xayrli duolar qilindi.
O‘zbekiston musulmonlari idorasi
Matbuot xizmati