Kuz – mo'l hosil fasli
Har bir faslning o'z tarovati, jilosi bor. Qishning ziynati, bahorning betakrorligi, yozning tantiligiyu kuzning barakoti kishiga huzur baxsh etadi. Ayni paytda yurtimizda oltin kuz.
Qadimdan kuz pishiqchilik, mo'l hosilni yig'ish va sarflangan mehnat samarasini ko'rish mavsumi hisoblanadi. Ushbu faslda rizqu ro'zimiz va oq oltinimiz bo'lgan paxta terib olinadi. Yil bo'yi fermer va dehqonlarning tinimsiz mehnatlaridan etilgan hosilni yig'ishtiradigan payt keldi.
“Hashar elga yarashar” deganlaridek, har birimiz dalalardagi hosilni nobud qilmasdan yig'ish olishda munosib hissamizni qo'shishimiz kerak. Nuroniy otaxon va onaxonlar duoyu xayrlari va saxovatpeshalar esa beg'araz yordamlari bilan paxtakorlarga kamarbasta bo'lishlari maqsadga muvofiqdir.
Qur'oni karimda: «…Bas, xayrli (savobli) ishlarda bir-biringizdan o'zishga oshiqingiz…» deya marhamat qilingan (Moida surasi, 48-oyat).
Hadisi sharifda “Kishi daraxt yoki ekin eksa, Alloh taolo hosil mislicha uning nomai a'moliga ajru savob yozadi”, deyiladi (Imom Axmad rivoyati). Shu bois hosilni yig'ib olish mavsumini savob ishlar fasli deyilishi ham bejiz emas.
Dehqonning barakali kasbi tufayli xalqimiz dasturxoni to'kin bo'ladi. Mehnatsevar dehqonlarning yurt mo'l-ko'lligi va xalqimiz farovonligi yo'lida qilgan ezgu ishlarini Yaratganning o'zi yuksak mukofotlashini quyidagi oyatda ta'kidlab, bunday deydi: «Ezgu ish qilganlarga chiroyli narsa (jannat) va ziyodalik (Allohninng diydorini ko'rish) bordir» (Yunus surasi, 26-oyat).
Jannatmonand diyorimizning mehnatkash bobodehqonlari, mirishkor bog'bonlari, serg'ayrat fermerlarimiz va qishloqlarimizdagi tinim bilmas barcha mehnatkashlar yig'im-terim mavsumiga jiddiy hozirlik ko'rishdi. Ular imon-e'tiqod va ixlos bilan Yaratgandan hosillarga qut-baraka so'ramokdalar.
Hozir har daqiqani g'animat bilishimiz kerak. Rizqu ro'zimizni mehnat orqali talab qilish muhim ishdir. Hazrati Odam alayhissallom ham dehqonchilik bilan shug'ullanganlar. Bu kasb u zotdan bizga meros bo'lib qolgan. Inson o'zi oilasini halol rizq-ro'z bilan ta'minlashi yo'lida sa'y-harakat qilishi va bu borada mashaqqat tortishi eng savobli amallardan biridir.
Paxta – rizq-ro'zimiz. Serquyosh o'lkamizda paxta etishtirilishi ham ulug' ne'matdir. Egnimizdagi kiyimbosh, kundalik hayotimizda foydalaniladigan zarur buyumlar ham aynan paxtadan ishlanadi. Hatto inson dunyodan o'tgach, oxirat sari kuzatilar ekan, unga ana shu paxtadan bo'lgan oppoq mato libos bo'ladi. O'zini shu muqaddas Vatannig farovonligi uchun daxldor va mas'ul deb biladigan har bir fuqaro paxta va boshqa hosillarning yig'im-terimi savobli ish ekanini nafaqat yaxshi anglaydi, balki shunga munosib ulushini qo'shadi. Shu bois barchamiz paxtaning har bir tolasini terib olish uchun uyushqoqlik bilan harakat qilishimiz lozim.
Hulosa qilib aytganda, paxta tiriklikda rizq, dunyodan o'tganimizda oxirat libosi bo'ladi. Ana shunday hosiyatli ekinni zaminimizda undirgani uchun Yaratganga shukronalar aytamiz. Alloh taolo paxta xirmonimizga ulkan baraka ato etsin.
Odiljon NARZULLAYeV,
Yangiyo'l tumani “Imom Sulton” jome masjidi imom–xatibi
“Solombo Times”: O‘zbekistonda “Uchinchi Renessans” g‘oyasini amalga oshirish davlat siyosatiga aylangan
Shri-Lankaning “Solombo Times” nashrida “O‘zbekistonda Yangi uyg‘onish davri: kelajak texnologiyalari yordamida buyuk o‘tmishni qayta tiklash” sarlavhali tahliliy maqola e’lon qilindi, deb xabar bermoqda “Dunyo” AA.
Shri-Lankalik taniqli jurnalist Fazan Navaz tomonidan yozilgan ushbu materialda so‘nggi o‘n yilda O‘zbekistonda Prezident Shavkat Mirziyoyev tashabbusi bilan Yangi O‘zbekistonni bunyod etish, “Uchinchi Renessans” g‘oyasini amalga oshirishga qaratilgan islohotlar va ularning samarali natijalari xususida so‘z yuritilgan.
Muallifning yozishicha, Markaziy Osiyo markazida sokin, ammo ulkan ahamiyatga ega inqilob yuz bermoqda. Bu kurash qurol-yarog‘ bilan emas, balki qo‘lyozmalar, muzeylar va mikrochiplar yordamida amalga oshirilmoqda.
Prezident Shavkat Mirziyoyev rahbarligida O‘zbekiston Samarqand va Buxoro kabi shaharlar jahon ilm-fani, she’riyati va falsafasining yetakchi markazlari bo‘lgan O‘rta asrlardagi “Oltin asr” shon-shuhratini qayta tiklashga intilmoqda.
Bu jarayonning o‘ziga xos jihati shundaki, O‘zbekiston ming yildan ziyod tarixga ega madaniy merosni asrash, qayta tiklash va keng ommaga yetkazish uchun sun’iy intellekt hamda raqamli texnologiyalardan faol foydalanmoqda.
Nashrda O‘zbekistonning boy madaniy va tarixiy merosi hamda uni saqlash bo‘yicha islohotlarga to‘xtalib o‘tilgan. Qayd etilganidek, bu zamin insoniyat tarixidagi eng buyuk allomalarga beshik bo‘lgan. Astronom va davlat arbobi Mirzo Ulug‘bek Samarqandda yulduzlarni hayratlanarli darajada aniq kuzatish imkonini bergan rasadxona barpo etgan. Xorazmdagi Ma’mun akademiyasi olimlari esa Yevropada Renessans boshlanishidan ancha avval matematika va tibbiyot sohalarida yuksak yutuqlarga erishgan edi.
O‘zbekiston yetakchisi bu tarixiy merosni tez-tez tilga olib, Mirzo Ulug‘bekni nafaqat buyuk olim, balki ilm-fanni eng yuksak qadriyat deb bilgan davlat arbobi sifatida ta’riflaydi. Davlat rahbari bugungi yangilanish jarayonini “Uchinchi Renessans” deb atab, uni O‘zbekistonning ilmu ma’rifat va madaniyat markazi sifatidagi mavqeini qayta tiklashga qaratilgan umummilliy loyiha sifatida baholaydi. Tarixchilar ta’biri bilan aytganda – bu atama mintaqada avval mavjud bo‘lgan ikki buyuk yuksalish davridan keyingi navbatdagi uyg‘onish bosqichini anglatadi.
Muallifning fikricha, O‘zbekistonda Uchinchi Renessans g‘oyasini amalga oshirish shunchaki gap emas, balki davlat siyosatiga aylangan.
“Bu ulkan maqsadning eng yorqin ramzi joriy yil Toshkentda qad rostlagan Islom sivilizatsiyasi markazidir. 2026 yil mart oyida 40 mamlakatdan tashrif buyurgan 1500 dan ortiq mutaxassis ishtirokida qurib bitkazilgan mazkur markaz o‘z bag‘rida islom olamining eng noyob yodgorliklaridan biri – VII asrga mansub Usmon Mus'hafini saqlaydi. Shuningdek, bu yerda ilmiy laboratoriyalar, restavratsiya ustaxonalari va arxivlar faoliyat yuritadi. Markaz allaqachon dunyodagi eng chiroyli yangi muzeylardan biri sifatida e’tirof etilgan”, – deya qayd etgan jurnalist.
Materialda ta’kidlanishicha, O‘zbekiston yondashuvining boshqalardan ajratib turadigan muhim jihati – bu sun’iy intellektdan iqtisodiy taraqqiyot vositasi sifatidagina emas, balki madaniy merosni muhofaza qilish vositasi sifatida ham foydalayotganidadir.
Sun’iy intellekt turizm sohasini ham tubdan o‘zgartirmoqda. Bu tashabbus 2026 yilda mamlakatga 12 million sayyohni jalb qilish rejasining bir qismi hisoblanadi.
Fazan Navaz o‘z maqolasini “Uchinchi Renessans” o‘z oldiga qo‘ygan maqsadlarga to‘liq erishadimi-yo‘qmi, buni vaqt ko‘rsatadi. Biroq bugunning o‘zidayoq O‘zbekiston qanday yo‘ldan odimlab borayotgani aniq ko‘rinib turibdi”, – degan so‘zlar bilan yakunlagan.
O‘zbekiston musulmonlari idorasi Matbuot xizmati