Raboh ibn Ubayda Bohiliy rahimahullohdan rivoyat qilinadi: «Umar ibn Abdulazizning oldida o'tirgan edim, bir a'robiy kelib, «Ey mo'minlarning amiri, bir hojat bilan keldim.

Juda nochor ahvoldaman. Qiyomat kuni Alloh sendan men haqimda so'raydi», dedi. Umar ibn Abdulaziz: «Gaplaringni yana bir qaytar-chi», dedi. U aytganlarini yana qaytardi. Umar ibn Abdulaziz boshini quyi soldi, ko'z yoshlari oqib, erni ho'l qilib yubordi. Keyin boshini ko'tarib, «Necha kishisizlar?» dedi. «Sakkiz nafar qizim bor», dedi nochor kishi. Halifa ularga uch yuz dirham berishni buyurdi. Qizlari uchun yana yuz dirham ajratdi. Keyin qo'liga yana yuz dirham berib, «Bu yuz dirhamni men o'z yonimdan beryapman. Musulmonlarning molidan berayotganim yo'q. Borib shuni ishlatib tur. Musulmonlarga ajratilgan pul chiqsa, undan yana olasan», dedilar.

«Solihlar gulshani» kitobidan