Dunyodagi eng ulug', muqaddas va faxrli kasb egasi bo'lgan Ustozlar va murabbiylarning kasb bayrami munosabati bilan Nukus Muhammad ibn Ahmad al-Beruniy o'rta maxsus islom bilim yurtida «Sizga ta'zim, aziz ustozlar» mavzusida tadbir bo'lib o'tdi. Muhtaram Prezidentimiz Shavkat Mirziyoev o'zining bayram tabrigida: «Ushbu qutlug' ayyomda siz, zahmatkash ustozlarga ko'nglimizda, yuragimizda bo'lgan yuksak hurmat-ehtirom va ezgu tilaklarni so'z bilan to'liq ifoda etish qiyin, albatta. Chunki sizlar dunyodagi eng bebaho boylik va boqiy merosni yaratish, uni xalqimizga, unib-o'sib kelayotgan yosh avlodimizga bezavol etkazish yo'lida chinakam fidoyilik ko'rsatib mehnat qilayotgan ulug' insonlarsiz. Bu ulkan boylik – aql-zakovat va ilm, bu o'lmas meros – yaxshi tarbiyadir» – deb ta'kidlagan edi.

Darhaqiqat, ustozlarning yoshlarimizning qalbiga va ongiga ona-Vatanga muhabbat va sodiqlik tuyg'ularini singdirish, ularni turli yot g'oyalardan himoyalash, komil inson etib tarbiyalashdagi fidoiy xizmatlarini barcha ota-onalar, keng jamoatchiligimiz, butun xalqimiz juda yaxshi biladi va alohida qadrlaydi.

Tadbir Qur'oni karim tilovati va xayrli duolar bilan boshlandi. So'ng bilim yurti mudiri Sh. Bahauddinov «Ustozlarga ehtirom – burchimiz» mavzusida ma'ruza qilib berdi va barcha o'qituvchi va murabbiylarni bayram bilan tabrikladi.

Tadbirda bayram munosabati bilan bilim yurtining bir guruh pedagog-o'qituvchilariga «Faxriy yorliq» va sovg'alar topshirildi. Bilim yurtining xushovoz talabalari tomonidan ijro etilgan ajoyib nashidalar, she'rlar va monologlar ishtirokchilarga manzur bo'lib, tadbirga o'zgacha zavq bag'sh etdi.

Tadbirdan so'ng muhtaram ustozlar milliy taomlar bilan bezatilgan bayram dasturxoniga taklif qilindi.