A'zolari soni jihatidan dunyoning ikkinchi yirik tashkiloti hisoblanuvchi Islom hamkorlik tashkiloti (IHT)ga 1969 yilning 25 sentyabrida Marokashning Rabot shahrida asos solingan edi.
O'sha paytda tashkilotning maqsadlari sifatida musulmon davlatlar o'rtasida ijtimoiy, iqtisodiy va siyosiy sohalar bo'yicha birdamlikni ta'minlash, mustamlakachilik, neomustamlakachilik va irqchilikka qarshi kurashish hamda Falastin ozodlik tashkilotini qo'llab-quvvatlash tilga olingan edi.
O'tgan vaqt davomida IHT islom dunyosining huquq va manfaatlarini himoya qiluvchi davlatlararo hamkorlik platformasiga aylandi. U umumiy aholisi 1,7 milliard bo'lgan 57 davlatni o'z atrofida birlashtirgan.
Bosh qarorgohi Saudiya Arabistonining Jidda shahrida joylashgan mazkur tashkilot 2011 yilgacha Islom konferentsiyasi tashkiloti deb atalgan. IHT tarkibida to'rtta doimiy qo'mita ishlab turadi, bular Quddus, Axborot va madaniyat masalalari, Savdo-iqtisodiy hamkorlik bo'yicha, Ilmiy-texnik hamkorlik bo'yicha qo'mitalardir.
azon.uz
Rossiya Federatsiyasi hududida vaqtincha bo‘lib turgan fuqarolarimiz bilan doimiy muloqotni qo‘llab-quvvatlab turish, ularning haq-huquqlarini himoyalash, huquqiy ongini oshirish, ma’rifatini ziyoda qilish bo‘yicha suhbatlar o‘tkazish maqsadida O‘zbekiston delegatsiyasining Tatariston va Boshqirdistonga xizmat safari uyushtirildi.
Prezident Administratsiyasining topshirig‘i ijrosiga muvofiq O‘zbekiston Respublikasi Tashqi ishlar vaziri o‘rinbosari O. Abdullayev boshchiligida yurtimizning Rossiya Federatsiyasidagi Favqulodda va Muxtor elchisi B.Asadov, Bosh konsuli M.Xayriddinov va bir qator tegishli tashkilotlar vakillaridan tashkil topgan delegatsiya tarkibida O‘zbekiston musulmonlari idorasi vakili Ibrohimjon Inomov ham ishtirok etdi.
Vatandoshlarimiz bilan “Ota-onani rozi qilish – farzandlik burchi”, “Halol kasb – baraka kaliti”, “Milliy va diniy qadriyatlarimiz”, “Oilada farzand tarbiyasi”, “Aqidada adashmaylik!”, “Ijtimoiy tarmoqlardan foydalanish odobi”, “Islomda bag‘rikenglik”, “Islomda vatanparvarlik tushunchasi” mavzularida suhbatlar o‘tkazildi. Har qanday diniy mavzudagi ma’lumotlar borasida O‘zbekiston musulmonlari idorasiga tegishli rasmiy internet tarmoqlardan foydalanish tavsiya etildi. Turli diniy oqimlardan ehtiyot bo‘lish zarurligi – ham shariat ko‘rsatmasi, ham zamon talabi ekani ta’kidlandi.
Rossiya musulmonlari markaziy diniy idorasi raisi, muftiy Talgat Safa Tadjuddin hazrat delegatsiya a’zolarini qabul qilib, O‘zbekiston xalqiga mehri o‘zgacha ekanini bildirdi. Uchrashuv davomida O‘zbekiston musulmonlari idorasi raisi, muftiy Shayx Nuriddin Xoliqnazar hazratlarining salomi esdalik hadyalari taqdim etildi. Muftiy Talgat Safa Tadjuddin hazrat mehmonlarni Diniy idora va uning qoshidagi Rossiya islom universiteti bilan tanishtirib chiqdi.
Xizmat safari davomida vatandoshlarimiz bilan bo‘lgan suhbatlarda bugun mamlakatimizda qilinayotgan ishlar to‘g‘risida to‘xtalinib, yurt tinchligi, xalq farovonligi va salomatligi, dinimiz ravnaqi yo‘lidagi islohotlar, yangiliklar haqida ham aytib o‘tildi.
O‘zbekiston musulmonlari idorasi
Matbuot xizmati