Fikr buzilishining sabablari (2-qism)
Fikrni buzadigan narsalarning ikkinchisi “jamoldir”. Insonning ko'zi chiroyli narsalarni ko'rishga o'ch bo'ladi. Masalan, uy, libos, ulov, ayollar va hokazo.
Hozirgi zamonda inson nigohini nazorat qilishi qiyin. Agar inson nigohini nomahramga qarashdan tiysa, bu ishidan uning qalbida nur paydo bo'ladi. Bu borada Rasulloh sollallohu alayhi va sallamdan hadis bor. Agar qaysi banda o'z nigohini nomahramdan olib qochsa, Alloh taolo uning ibodatiga lazzat kiritib qo'yadi. Ibodatning lazzatini tuymoq esa komil imondan darak. Aksariyat insonlar ko'p narsalarda parhezkorlik qiladilar. Lekin nomahramdan ko'zlarini to'smaganlari uchun Alloh taolodan uzoqdadirlar. Bu gunohdan saqlanish lozim. Chunki Alloh taolo ba'zi narsalarni ko'rishga buyurib, boshqalariga nazar solishdan qaytaradi.
Alloh taolo marhamat qiladi:
«O'zingni ertayu kech Rabbilariga duo qilib, Uning yuzini iroda qiluvchilar ila sabr etib tut. Hayoti dunyo ziynatini xohlab, ulardan ikki ko'zingni burma» (Kahf surasi, 28-oyat).
Ba'zi narsalarga nigoh qaratishdan qaytaradi. Ulardan biri nomahramga qarashdir.
Alloh taolo marhamat qiladi: «Sen mo'minlarga ayt ko'zlarini tiysinlar» (Nur surasi, 30-oyat). Rabbimiz shu kabi fitnalaridan saqlanishga buyuradi.
"Sharm va hayo” kitobidan
Farg‘onada yosh imom-xatiblar bilan ma’rifiy muloqot o‘tkazildi
“Yangi O‘zbekiston yoshlari — 2030” strategiyasi ijrosini ta’minlash maqsadida Farg‘ona viloyatida faoliyat yuritayotgan yosh imom-xatib va imom-noiblar ishtirokida “Yoshlar bilan bir kun” loyihasi doirasida uchrashuv tashkil etildi.
Tadbirda Farg‘ona viloyati bosh imom-xatibi Ubaydulloh domla Abdullayev ishtirok etib, yosh diniy soha xodimlari bilan samimiy muloqot o‘tkazdi.
Suhbat davomida mamlakatimizda yoshlarga yaratilayotgan keng imkoniyatlar va ulardan samarali foydalanish masalalariga alohida to‘xtalib o‘tildi. Shuningdek, yosh imomlarga quyidagi yo‘nalishlarda muhim tavsiyalar berildi:
-
Aholi va jamoatchilik bilan muloqot madaniyatini yuksaltirish;
-
Ta’sirchan va mazmunli ma’ruzalar tayyorlash hamda voizlik odobiga rioya qilish;
-
Masjidlar faoliyatini zamon talablari darajasida to‘g‘ri tashkil etish.
Muloqotda yosh diniy soha vakillarining jamiyatda tutgan o‘rni, ayniqsa, yosh avlodni vatanparvarlik, sof ma’rifat va ezgulik ruhida tarbiyalashdagi mas’uliyati yuqori ekani ta’kidlandi.
Ochiq va samimiy ruhda o‘tgan uchrashuvda ishtirokchilar o‘zlarini qiziqtirgan savollarga batafsil javob oldilar.
Tadbir yakunida yosh mutaxassislar viloyat vakilligi va soha mutasaddilarining ish jarayoni bilan yaqindan tanishdilar.
O‘zbekiston musulmonlari idorasi
Farg‘ona viloyati vakilligi
Matbuot xizmati
