Buxoro viloyatida qator masjidlar mo'min-musulmonlar ixtiyoriga topshirilyapti. Jumladan, bugun G'ijduvon tumanidagi “Imom Buxoriy” jome masjidi ochilganidan ko'plab mo'min-musulmonlar behad shod.

So'nggi yillarda masjidda ham namozxonlar soni oshib, eski uslubda qurilgan masjid torlik qilib qolayotgan edi. Shu bois mazkur masjidni homiy va saxovatpesha tadbirkorlar ko'magida qayta qurildi. Bu jome ko'p yillar mo'min-musulmonlarga xizmat qiladi, inshoalloh.

Masjid ochilishida Buxoro viloyati hokimining o'rinbosari E.Majidov, G'ijduvon tuman bosh imom-xatibi Orif domla Amonov, Mir Arab oliy madrasasi rektori ustoz Haydarxon domla Yo'ldoshxo'jayev va masjid imom-xatibi O.Ruziyev qatnashdi.

Ma'lumot uchun, masjidning eski binosi 150 kishiga mo'ljallangan edi. Yomg'irli, qorli-qirovli kunlarga to'g'ri keladigan juma va ikki hayit bayramida namozxonlar ibodat qilish uchun qiynalib qolishayotgan edi. Yangi jome o'z bag'riga 1 000 kishidan ziyod namozxonni sig'diradi.

Jome masjidning yangi binosiga issiq pol yotqizildi. Endilikda sovuq kunlarda namozxonlar emin-erkin, xotirjam ibodatlarni ado etadi.

Alloh taolo bu masjidni doimo obod baytlardan qilsin. Uning qurilishiga hissa qo'shgan barchaga ulug' ajrlar ato etsin, bunday xayrli ishlar yurtimizda bardavom bo'lsin.

Anvar Nurullayev,
UMI Buxoro viloyati vakilligi mutaxassisi.