Parkent tumani “Sirli” jome masjidida marhum muftiy Usmonxon Alimov, Toshkent viloyatining sobiq bosh imom-xatibi Hayrulloh domla Turmatov, Parkent tumanida yashab, dinimizga xizmat qilib o'tgan imom domlalarni xotirlash maqsadida ehson dasturxoni yozildi.
Qur'oni karim tilovati bilan boshlangan xotira tadbirida marhum imomlarimizning xayrli ishlari, dinimiz ravnaqi yo'lida qilgan xizmatlari eslanib, ularning haqlariga xayrli duolar qilindi.
Yig'ilishda hududdagi masjidlar qurilishida faol, tashabbuskor va jonkuyar bo'lgan imomlar O'zbekiston musulmonlari idorasi Toshkent viloyati vakilligi tomonidan tashakkurnomalar bilan taqdirlandi.
Tadbirda ishtirok etgan O'zbekiston musulmonlari idorasi Masjidlar bo'limi mudiri Muhammadnazar domla Qayumov, Toshkent viloyati bosh imom-xatibi o'rinbosari Mirodil domla Mirjalilov, Toshkent tumani bosh imom-xatibi G'ulomiddin domla Ergashev, Zangiota tumani “Abu Bakr Siddiq” jome masjidi imom-xatibi Nurali domla Mavlonov o'z ma'ruzalari hamda duolari bilan yig'ilishni chiroyli yakunlab berdilar.
Tadbir so'ngida Qur'oni karim xatmi marhum domlalar ruhlariga bag'ishlandi.
Nukus shahridagi "Muhammad ibn Ahmad al-Beruniy" o‘rta maxsus islom bilim yurti kichik sport maydonida "Sport - salomatlik garovi" shiori ostida musobaqa tashkil etildi.
Ushbu futbol musobaqasi qariyb ikki hafta davomida ko‘tarinki kayfiyatda, sog‘lom raqobat ruhida o‘tdi. Talabalar o‘z jamoalari bilan g‘alaba uchun kurashar ekan, o‘zaro hurmat, jamoaviylik va sportga bo‘lgan mehrini namoyon etdi. Bellashuvlarda har bir jamoa g‘alabaga munosib o‘yin namoyish etdi, tomoshabinlar esa har bir gol va harakatni qizg‘in olqishlar bilan kuzatib bordi.
Uch guruhda, jami 11 jamoa o‘yinlarda ishtirok etdi. Dastlabki o‘yinda A guruhidan, V guruhidan va S guruhidan g‘oliblar aniqlanib, keyingi bosqichga yo‘llanma oldi.
Yakuniga ko‘ra, 4-B kurs talabalaridan tuzilgan guruh 3-o‘rinni, 2-A kurs talabalaridan tuzilgan guruh 2-o‘rinni va 4-S kurs talabalaridan tuzilgan guruh 1-o‘rinni egalladi.
G‘olib jamoalar bilim yurti jamoasi tomonidan tayyorlangan diplom va sovg‘alar bilan taqdirlandi. Shuningdek, musobaqa davomida eng yaxshi darvozabon, eng yaxshi hujumchi, eng yaxshi o‘yinchilar aniqlanib, ular ham faxriy yorliqlar bilan taqdirlandi.
Musobaqa yakunida Qoraqalpog‘iston musulmonlari qoziyoti qozisi B.Razov, Qoraqalpog‘iston Respublikasi Vazirlar Kengashi raisining ijtimoiy va diniy tashkilotlar bo‘yicha kotibiyat mudiri J.Yusupov hamda bilim yurti mudiri J.Abdirazakovlar musobaqa ishtirokchilarini g‘alabalari bilan tabriklab, kelgusi o‘qishlarida muvaffaqiyatlar tiladi.