Qur'oni karimni asl arab tilida o'qish va yodlash insonni ikki dunyo saodatiga etaklaydi. Ayniqsa, Qur'onni tartil va ohang bilan bezab o'qish kishilarni rom etadi. Zero, Rasululloh sollallohu alayhi vasallam: “Qur'onni ovozingiz bilan bezang!” deganlar (Imom Abu Dovud va Imom Nasoiy).

Darhaqiqat, go'zal so'z go'zal ovoz bilan yanada yoqimli bo'ladi. Uning xushovozda o'qilishi odamlarda Qur'oni karimni tinglashga bo'lgan moyillikni yanada kuchaytiradi.

Ana shunday xushovoz qorilardan biri, Toshkent shahri Ko'kcha dahasidagi “Shayx Zayniddin” jome masjidi imom noibi, xushovoz hofizi Qur'on Muhammadloiq qori Aminovning Qur'oni karimni o'qishni o'rganuvchilar uchun mo'ljallangan ikki kitobi – “Boshlang'ich arab tilidan husnixat daftari” va “Boshlang'ich arab tilidan o'qish kitobi” poytaxtdagi “Sano Standart” nashriyotida chop etildi.

Ushbu ikki risola Qur'oni karimni to'g'ri o'qishni o'rganishni istaganlar uchun ajoyib tuhfa bo'ldi. Muallifning “Boshlang'ich arab tilidan husnixat daftari”da arab tili yozuviga oid eng birinchi galdagi qonun-qoidalar, to'g'ri va chiroyli yozish ko'nikmalari bayon etilgan.

Birinchi kitobda dastlab, arab tili alifbosi, harflarning qo'shib yozilish holatlari, harakatlar keltirilgan. Shundan so'ng, arab tili harflari va ularning yozilishi berilgan. O'rganuvchilarga oson bo'lishi uchun arab tili harflarining talaffuz qilinish qoidalari, o'zbek tilidagi harflarga mutanosibligi hamda arab raqamlarining yozilishi ham bayon etilgan. O'rganuvchilar harflarning yozilishini mashq qilishlari uchun alohida varaqlar ham ajratilgan.

Muhammadloiq qori Aminovning ikkinchi kitobi “Boshlang'ich arab tilidan o'qish kitobi” avvalgi risolaning uzviy davomi bo'lib, unda Qur'oni karim o'qishni o'zlashtirishga oid ma'lumotlar berilgan.

Ikkinchi risola 2 qismdan iborat bo'lib, birinchi qismda harflarning to'g'ri talaffuz qilinishi (mahraji) yozma va rasmlar orqali tushuntirilgan. Shuningdek, hafrlarning yozilishiga oid husnihatlar ham berilgan. Risolaning ikkinchi qismi esa tajvid qoidalariga bag'ishlangan bo'lib, unda Qur'oni karimni to'g'ri o'qishga oid qonun-qoidalar bayon etilgan.

Kitoblar muallifining ko'p yillik Qur'oni karim tajvidini o'rgatishga oid tajribalari, mashhur qorilarning Kalomullohni to'g'ri o'qish uchun qo'llagan usullari va boshqa zamonaviy metodlar asosida yozilgan.

Oson va ravon tarzda yozilgan ushbu ikki risolani Alloh taolo Qur'onga oshno xalqimizning uchun foydali va muborak qilsin!

O'zbekiston musulmonlari idorasi Matbuot xizmati