Aziz va tabarruk ulamoi kirom-ustozlar –
qadrli va qadrdon imom-xatiblar, munis otinoyilar!

Bugungi yurtimizni tinchligida sizlarning ham xizmatlaringiz beqiyos katta!

Muborak dinimiz kamoloti, masjidu madrasalarimiz obodligi uchun qilayotgan tinimsiz mehnatlaringizni, samarali sa'y-harakatlaringizni va beminnat xizmatlaringizni yuksak qadrlab, katta tashakkurlar bildiramiz!!! Sizlarning mashaqqatli va sermahsul faoliyatlaringiz har qanday tahsinlarga loyiq va munosib!!!

Dinu xalqimiz uchun ertayu-kech xizmat qilayotgan muhtaram Prezidentimizning “Jaholatga qarshi ma'rifat” oltindan qimmat g'oyalarini barpo etish maqsadida har bir xonadonni hidoyatga chorlashda, har bir oilani islom nuri bilan munavvar qilishda, har bir mo''min va mo''minalarga ma'rifat ulashishda sizlarning hissalaringiz hammadan ham ko'p va sarbaland bo'lishida hech qanday shubhamiz yo'q.

Qancha ko'p oilaga “Islom nuri” gazetasi, “Hidoyat” va “Mo'minalar” jurnallari kirib borsa, shuncha ko'p odam Qur'oni karim tafsiri, Hadisi sharif sharhi, aqida, fiqh masalalaridan bahramand bo'lishlari va botil iddaolarga berilmasdan muqaddas dinimiz ko'rsatgan yo'llardan yurishlari – xar birimizning ulkan yutug'imizdir!

"Jaholatga qarshi ma'rifat" bebaho g'oyani "Hidoyat" jurnali, "Islom nuri" gazetasi va "Mo'minalar" jurnallari obunasi orqali ham ancha ta'sirli va unumli amalga oshirishimiz mumkinligi hammamizga ayon. Buning uchun O'MI tizimidagi barcha xodimlar nafaqat o'zimiz obuna bo'lishimiz, balki boshqalarni ham obunaga targ'ib etishimiz – ham farzimiz, ham qarzimiz, ham burchimiz, ham ishimiz bo'lishi darkor!

Iloho yurtimiz tinchligi, Vatanimiz ravnaqi, xalqimiz salomatligi va farovonligi, dinimiz obodligi uchun olib borayotgan mashaqqatli va sharafli, og'ir va savobli, sermahsul va olijanob faoliyatlaringizda Hudoim taolo doimo omadlaringizni berib, ikki dunyoda ham ishlaringizni o'ngidan qilsin!

Ibrohimjon INOMOV,
O'zbekiston musulmonlari idorasi raisi o'rinbosari