Abu Hurayra roziyallohu anhudan rivoyat qilinadi. Bir kishi Nabiy sollallohu alayhi va sallamga: “Menga nasihat qiling”, dedi. U zot alayhissalom: “g'azab qilma!”, deya bir necha marta aytdilar. Sharh: Imom Buxoriy ushbu 5765-xadisni g'azabdan ehtiyot bo'lish bobida keltirgan.

Hadisning ahamiyati

Imom Jardaniy aytadi: “Bu hadis juda ulug' hadisdir. Chunki unda dunyo va oxirat yaxshiligining barchasi jam qilingan”. Hadisda kelgan “bir kishi”dan murod Abu Dardo roziyallohu anxudir.

Tabaroniy Abu Dardodan rivoyat qilgan hadisda: Aytdim: “Ey Rasulalloh, meni jannatga kiritadigan amalga dalolat qiling?”. Nabiy alayhissalom aytdilar: "G'azab qilma va sen uchun jannat bordir".

Hadisda kelgan “g'azab qilma” nazmidan murod shuki, inson g'azabga sabab bo'ladigan ishlardan uzoqlashishi kerak. Agar inson g'azablansa, hech narsa qilmaslik kerak bo'ladi.

Abdulloh ibn Amr roziyallohu anhudan rivoyat qilinadi: O'sha kishi Nabiy sollallohu alayhi va sallamdan so'radi: “Allohning g'azabidan meni uzoq qiladigan narsa nima?” U zot alayhissalom dedilar: “G'azab qilma!”.

Hasan Basriy aytadi: kimda to'rt narsa bo'lsa, Alloh uni shaytondan saqlaydi va unga do'zaxni harom qiladi: istak, qo'rqinch, shahvat va g'azab kelganda uni tiyish.

Manbalar asosida Toshkent islom instituti 4-bosqich talabasi
Muhammadisoxon Mahmudxonov tayyorladi