"Sarhisob" tanlovida ishtirok eting!
O'zbekiston Respublikasi Vazirlar Mahkamasi huzuridagi Din ishlari bo'yicha qo'mita, O'zbekiston musulmonlari idorasi, O'zbekiston xalqaro islom akademiyasi bilan hamkorlikda yangilanyotgan O'zbekistonda diniy-ma'rifiy sohada amalga oshirilayotgan islohotlarni keng targ'ib etish, tinchlik va osoyishtalikni qadrlash, dinlararo bag'rikenglik va hamkorlik g'oyalarini ommalashtirish, xalqimiz, ayniqsa, o'sib kelayotgan yosh avlodni yot g'oyalardan himoya qilishda faollik ko'rsatgan ijodkorlarni qo'llab-quvvatlash va munosib rag'batlantirish maqsadida «Sarhisob» tanlovini o'tkazadi.
Tanlovning hududiy bosqichida 2021 yilning 1 yanvaridan 2021 yilning 1 noyabrgacha gazeta va jurnallarda bosilgan, radio orqali efirga uzatilgan, televideniyeda ko'rsatilgan va Internet tarmog'ida e'lon qilingan materiallar 2021 yilning 10 noyabriga qadar qabul qilinadi. Hududiy bosqich g'oliblari respublika bosqichida qatnashish huquqini qo'lga kiritishadi.
Tanlovning hududiy bosqichi 20 noyabrgacha o'tkazilishi ko'zda tutilgan.
Respublika bosqichi g'oliblari hududiy bosqichda g'olib chiqqan ishtirokchilar orasidan hakamlar hay'ati tomonidan tanlov asosida saralanadi. Tanlov g'oliblari OAVda e'lon qilinadi.
Tanlovning respublika bosqichida g'olib deb topilganlar quyidagi yo'nalishlar bo'yicha taqdirlanadi:
Bosh mukofot: «Jaholatga qarshi – ma'rifat» mavzusidagi eng yaxshi ijodiy ish.
Folib maxsus diplom va tashkilotchilarning qimmatbaho sovg'alari bilan taqdirlanadi.
Asosiy mukofotlar:
eng yaxshi ijodiy ish uchun mukofot (televideniye – I, II, III o'rinlar);
eng yaxshi ijodiy ish uchun mukofot (radio – I, II, III o'rinlar);
eng yaxshi ijodiy ish uchun mukofot (davriy matbuot – I, II, III o'rinlar);
eng yaxshi ijodiy ish uchun mukofot (Internet – I, II, III o'rinlar);
eng faol targ'ibotchi (I, II, III o'rinlar);
Tanlovga tele-, radio-, bosma materiallar hamda Internetda e'lon qilingan ishlar taqdim etiladi (3 tadan kam bo'lmasligi kerak).
Televideniye bo'yicha videomateriallar, axborot tashuvchi vositaning qanday ko'rinishda bo'lishidan qat'i nazar, 5 minutdan 30 minutgacha bo'lishi kerak.
Radioeshittirishlar (audiokasseta yoki sistemali disk) 5 minutdan 30 minutgacha bo'lishi kerak.
Matbuot va Internet materiallari davriy nashrning asl nusxasi yoki ko'chirma nusxasida taqdim etilishi lozim.
Tanlovga yuborilgan materiallarga quyidagilar ilova qilinadi:
– muallifning ismi-sharifi, turar joyi, uy va ish telefonlari;
– o'z sohasida olib borayotgan faoliyati to'g'risida qisqacha ma'lumot;
– pasport nusxasi.
Tanlovda ishtirok etuvchilarning materiallari har bir hudud bo'yicha O'zbekiston musulmonlari idorasining hududiy vakilliklariga topshiriladi. Murojaat uchun ma'lumotlar:
Andijon viloyati (74) 228-01-58
Buxoro viloyati (65) 224-40-51
Jizzax viloyati (72) 223-85-30
Navoiy viloyati (36) 225-17-47
Namangan viloyati (69) 226-10-01
Samarqand viloyati (66) 235-34-18
Sirdaryo viloyati (67) 227-23-00
Surxondaryo viloyati (76) 225-52-00
Farg'ona viloyati (73) 226-72-44
Horazm viloyati (62) 228-44-38
Toshkent viloyati (95) 142-14-54
Toshkent shahri (95) 146-77-00
Qashqadaryo viloyati (75) 225-56-32
Qoraqalpog'iston Respublikasi (61) 229-02-64
«Sarhisob» tanlovida ishtirok eting va g'olib bo'ling!
Tashkiliy qo'mita
Muqaddas maskanga munosabat qanday bo‘lishi kerak?
Imom Buxoriy majmuasi nafaqat O‘zbekiston, balki butun islom olami uchun ulug‘ va muqaddas qadamjolardan biri hisoblanadi.
Hazrat Imom Buxoriydek buyuk muhaddis nomi bilan bog‘liq ushbu majmua bugun yurtimizning eng yirik ma’naviy va madaniy markazlaridan biriga aylangan. Har kuni minglab ziyoratchilar bu yerga kelib, ajdodlar merosi, ma’rifat va muqaddas tarix bilan yuzlashmoqda.
Majmua nafaqat ziyoratgoh, balki xalqimizning boy ma’naviy merosi, milliy me’morchiligi va islom sivilizatsiyasidagi o‘rnini namoyon etuvchi noyob madaniy ob’yektdir. Uni barpo etish uchun katta mehnat, yuksak mahorat va qimmatbaho qurilish materiallari sarf etilgan. Shu bois bu qutlug‘ maskanni asrab-avaylash har birimiz uchun muhim vazifadir.
Yaqinda Madaniy meros agentligi tomonidan ayrim ziyoratchilarning majmua hududida beparvo munosabatda bo‘layotgani haqida ma’lumot berildi. Ayrim holatlarda ustunlar, ayvonlar va muzey eksponatlariga ehtiyotsiz munosabatda bo‘lish, chiqindilarni duch kelgan joyga tashlash kabi holatlar kuzatilmoqda. Bu esa nafaqat ziyoratgoh ko‘rkiga, balki uning ma’naviy muhitiga ham salbiy ta’sir ko‘rsatadi.
Bu holat barchamizni sergaklikka chaqirishi kerak. Zero, muqaddas qadamjoga kelgan inson avvalo o‘zini munosib tutishi, tozalik va tartib-qoidalarga amal qilishi lozim. Chunki ziyoratgoh — oddiy sayrgoh emas. Bu yerda asrlar nafasi, buyuk ajdodlar ruhi va ma’rifat ziyosi mujassam.
Tozalik esa inson madaniyatining eng muhim ko‘rsatkichlaridan biri. Islom ta’limotida ham poklikka alohida ahamiyat berilgan. Payg‘ambarimiz Muhammad alayhissalom “Tozalik — iymonning yarmidir”, deya ta’kidlaganlar. Demak, ziyoratgoh hududida ozodalikni saqlash nafaqat fuqarolik burch, balki ma’naviy mas’uliyat hamdir.
Ayniqsa, chet ellik mehmonlar O‘zbekiston haqidagi ilk taassurotni aynan shunday muqaddas maskanlar orqali oladi. Agar ziyoratgoh ozoda, tartibli va fayzli bo‘lsa, bu xalqimizning yuksak madaniyati va ma’naviyatini namoyon etadi. Aksincha, beparvolik va tartibsizlik mamlakatimiz nufuziga salbiy ta’sir ko‘rsatishi mumkin.
Yosh avlodni ziyoratgoh madaniyati ruhida tarbiyalash ham muhim ahamiyatga ega. Bolalar kattalardan ibrat oladi. Agar ota-ona muqaddas joyda tartibga amal qilsa, ehtiyotkor bo‘lsa, farzand ham shu ruhda tarbiya topadi. Shu bois har bir inson o‘z harakati bilan boshqalarga namuna bo‘lishi kerak.
Imom Buxoriy majmuasi — millatimiz g‘ururi va ma’naviy boyligi. Uni asrash, tozaligini saqlash va ehtirom bilan munosabatda bo‘lish har bir insonning vijdoniy burchidir. Ziyoratgohlarga bo‘lgan munosabatimiz orqali biz o‘z madaniyatimiz, ma’naviyatimiz va ajdodlar merosiga bo‘lgan hurmatimizni namoyon etamiz.
Asliddin Mustafoyev, majmua axborot xizmati rahbari.
O‘zbekiston musulmonlari idorasi Matbuot xizmati
