Imom Kisoiy hikoya qiladi:

«Bir ayolni ko'rib qoldim. U o'g'ilchasini ilm halqasiga borishga undardi. Bolakay borishni istamay qochib, yugurib yurardi. Shunda ayol: «O'g'ilcham boraqolgin, bo'lmasa mana bu cho'ponga o'xshab qo'y boqib yuraverasan», deya menga ishora qildi.

Shunda men o'zimga-o'zim dedim: «Qara, seni bilimsizlik va jaholatga misol sifatida, zarbulmasal ko'rsatilyapsan!».

Keyin bo'lsa, Kisoiy qo'ylarini bozorga olib chiqib sotdida, ilm talabida safarga chiqib ketdi. O'sha vaqtda yoshi qirqda edi.

Shoir qanday to'g'ri aytgan:

Ilmda yutuqqa erishgan u bilan hamisha yashashda davom etadi,

Insonlar vafot etsalarda, ilm ahli hayot bo'laveradilar.

Muhammad Hasan Dedu deydi:

«Qachonki iymon qalblarga chuqur o'rnashar ekan, biron bir bashariy quvvatning uning oldida to'sqinlik qila olishi imkonsizdir. Ana, Fir'avnning sehrgarlarining qalblari qachonki iymon sharobi ila qoplanib to'lgach, Fir'avnni daraxtga xochlab osish yoki qatl etish ila ko'rsatgan tahdididan aslo qo'rqmadilar va albatta dedilar: «Bas, nima hukm qilsang, qilaver. Sen faqat hayoti dunyoda hukm chiqarasan, xolos», (Toha surasi, 72-oyat).

Izoh: Fir'avn o'z qarichi bilan o'lchar edi. U tahdid, azob-uqubat, qiynash, chopish-kesish, o'ldirish bilan odamlarni izmimda ushlab turaman, deb xayol qilardi. Ammo insonning qalbiga haqiqiy iymon kirganida, uning bu choralari zarracha ham ta'sir qilmay qolishini anglamasdi. Uning sobiq sehrgarlari qalbiga ana shunday iymon jo bo'lgan edi. Endi ular Fir'avnning hech qanday do'q-po'pisalaridan qo'rqmasdilar. «Ular: «Biz seni zinhor o'zimizga kelgan ochiq-oydin (mo''jiza)lardan va bizni yaratgan zotdan ustun qo'ymaymiz. Bas, nima hukm qilsang, qilaver. Sen faqat hayoti dunyoda hukm chiqarasan, xolos. Albatta, biz Robbimiz xatolarimizni va sen bizni majbur qilgan sehrni mag'firat qilishi uchun iymon keltirdik. Alloh yaxshi va boqiydir», dedilar». (Toha surasi, 72-73 oyatlar) tafsiridan.

Manba: arabicuz