6 sentyabr' kuni O'zbekiston musulmonlari idorasi tasarrufidagi 3 ta oliy diniy ta'lim muassasasi va 10 ta o'rta maxsus islom ta'lim muassasasida 2021-2022 o'quv yilining boshlanishi va O'zbekiston Respublikasi mustaqilligining 30 yilligiga bag'ishlangan bayram tadbirlari bo'lib o'tdi.

Ushbu tadbirlarda O'zbekiston musulmonlari idorasi hamda Din ishlari bo'yicha qo'mita rahbar va mac'ul xodimlari, viloyat vakillari, martabali mehmonlar, o'qituvchi va talabalar, ota-onalar ishtirok etdi.

Marosimlar davlat madhiyasi, Qur'on tilovati va xayrli duolar bilan boshlandi. So'ngra ta'lim muassasalari rahbarlari va martabali mehmonlar so'zga chiqib, talabalarni mutaqillikning 30 yillik bayrami, yangi 2021-2022 o'quv yilining boshlanishi va qabul imtihonlaridan muvaffaqiyatli o'tib, ta'lim muassasalarining birinchi kursiga o'qishga kirgan talabalarni bilan tabriklab, duoi xayrlar qildilar.

Shundan so'ng ta'lim muassasalarining barcha guruhlarida “Yangi O'zbekistonda erkin va farovon yashaylik!” shiori ostida “Mustaqillik darsi” o'tkazildi. Ushbu darslar maxsus video slaydlar asosida olib borildi.

Ma'lumot uchun, 2021-2022 o'quv yili uchun oliy diniy ta'lim muassasalariga 216 nafar, o'rta maxsus islom ta'lim muassasalariga 270 nafar, jami 486 nafar abituriyentlar talabalikka qabul qilindi.

Eslatib o'tamiz, hozirda barcha oliy va o'rta-maxsus diniy ta'lim muassasalarida jami 2212 nafar talaba tahsil olmoqda. Ularga 425 nafar malakali pedagog-o'qituvchi dars bermoqda.

O'zbekiston musulmonlari idorasi matbuot xizmati