Prezident Shavkat Mirziyoevning "Yangi O'zbekiston" gazetasiga bergan interv'yusi Malayziya ekspertlar hamjamiyatida katta qiziqish uyg'otdi, deb xabar bermoqda "Dunyo"axborot agentligi.

Fariza Shom, Malayziya Milliy universiteti qoshidagi Islom tsivilizatsiyasi instituti direktori, professor:
– Prezident Shavkat Mirziyoev bilan suhbatni diqqat bilan o'qib chiqdim. Avvalo, Malayziya O'zbekistonda siyosiy-huquqiy sohada, shuningdek, vijdon va din erkinligini ta'minlash, din sohasini erkinlashtirish, bag'rikenglik va insonparvarlik madaniyatini rivojlantirish borasida amalga oshirilayotgan keng ko'lamli islohotlarni alohida qiziqish bilan kuzatayotganini ta'kidlashni istardim.

Darhaqiqat, so'nggi besh yilda O'zbekiston uchun jamiyat va davlat hayotining barcha sohalarida murakkab o'zgarishlar davri belgilandi. Shu nuqtai nazardan islom tsivilizatsiyasi rivojiga beqiyos hissa qo'shgan buyuk o'zbek ilohiyotchilari va mutafakkirlarining ilmiy-ma'naviy merosini yanada chuqur o'rganish va ommalashtirish borasida amalga oshirilayotgan chora-tadbirlar alohida e'tiborga loyiqdir.

Faqat so'nggi yillarda O'zbekistonda yirik ilmiy muassasalar o'z faoliyatini boshladi, ular orasida Samarqanddagi Imom Buxoriy va Surxondaryo viloyatidagi Imom Termiziy xalqaro ilmiy-tadqiqot markazlari, shuningdek, Toshkentdagi O'zbekiston Halqaro islom akademiyasi va Imom Moturidiy xalqaro ilmiy-tadqiqot markazi ham bor.

Hozirgi kunda Toshkent shahrida qurilayotgan Islom tsivilizatsiyasi markazi o'zbek xalqining boy ma'naviy merosini chuqur o'rganish va xalqaro miqyosda targ'ib etish, shuningdek, yosh avlodni milliy va umuminsoniy qadriyatlar asosida tarbiyalashda muhim o'rin tutishiga shubha yo'q. Markazning yangi binosi Markaziy Osiyoda mehnat qilib, jahon madaniyati va musulmon tsivilizatsiyasi rivojiga beqiyos hissa qo'shgan buyuk olim va mutafakkirlarning ulkan bilim va ijod qatlamini to'plashi meni ruhlantiradi.

Shu o'rinda aminmanki, yangi O'zbekiston qurilishi islom olamining buyuk mutafakkirlarining noyob madaniy merosini chuqurroq o'rganish bilan davom etadi, bu esa, shubhasiz, mamlakatda Uchinchi Renessans davrining qayta tiklanishiga zamin yaratadi.

O'zbekiston musulmonlari idorasi matbuot xizmati