Habar berganimizdek, bugun, 13 avgust kuni yurtimizdagi bir guruh taniqli ulamolari Jizzax viloyatiga tashriflari boshlandi.

Safar davomida O'zbekiston musulmonlari idorasi raisining birinchi o'rinbosari Homidjon domla Ishmatbekovning ilk tashrifi Sharof Rashidov tumanidagi “Qo'shchinor” masjidida bo'ldi.

Homidjon domla jamoat bilan juma namozini ado etgandan so'ng namozxonlarga ma'rifiy ma'ruza qilib berdilar. Unda avvalo viloyat ahlini yurtimizda bo'layotgan o'zgarishlar mazmun-mohiyati, butun dunyoda bo'lganidek yurtimizda koronavirus yuqumli kasalligi qayta avj olayotgani, uning oldini olish uchun shifokorlar tavsiya qilgan karantin qoidalariga amal qilish, davlat tomonidan xorijdan olib kelinayotgan vaktsinalar bilan emlanish lozimligini ta'kidladilar.

Ma'ruza davomida Islom dinining asl mohiyati, musulmon kishi faqat yakkayu yagona Haq taologa ibodat qilishi, shirk, bid'at amallardan saqlanish kerakligi, bunda Payg'ambarimiz Muhammad sallollohu alayhi va sallamga ergashib, u kishining sunnatlariga qat'iy amal qilish eng to'g'ri yo'l ekanini aytdilar. Shuningdek, ne'matlar shukrini ado etish, uni yanada ziyoda qilishini eslatdilar.

Suhbat davomida namozxonlarni qiziqtirgan savollariga javob berdilar. Yakunda jamoat bilan Alloh taolodan yurtimiz tinchligi, xalqimiz farovonligi, butun dunyodan virus balosini aritishini so'rab duoi-xayrlar qilindi.

O'zbekiston musulmonlari idorasi matbuot xizmati