Payg‘ambarimiz sollallohu alayhi va sallam bunday deganlar: “Musulmonning (boshqa) musulmon zimmasidagi haqqi oltitadir: “Unga ro‘baro‘ kelsang, salom ber, sen (biror narsaga) taklif etsa, uni qabul qil, sendan nasihat so‘rasa, unga nasihat qil, agar aksirib, Allohga hamd aytsa, unga tashmit ayt, betob bo‘lsa, uni ziyorat qil, vafot etsa, (janozasiga) ergash (ya’ni qatnash)” dedilar” ( Imom Muslim rivoyati). Bu olti haqning biri nasihat berishdir. Agar musulmon boshqa musulmondan nasihat so‘rab kelsa, unga xolis nasihat berishi lozim. Zero, nasihat qilish har bir mo‘min-musulmonning boshqa mo‘min-musulmondagi haqlaridan biridir.

Nasihat qilishning quyidagi odoblari bor: 

1. Nasihat so‘rab kelgan kishini ochiq yuz bilan qarshi olish.
2. Nasihat so‘rab kelgan kishidan hol-ahvol so‘rash.
3. Nasihat so‘rab kelgan kishining fikrini oxirigacha tinglash.
4. Nasihat berishni yaxshi niyat bilan boshlash.
5. Nasihat so‘rab kelgan kishining ko‘ngliga tegmasdan unga chiroyli nasihat qilish.
6. Nasihat o‘zida dunyo va oxirat manfaatlarini qamrab olishi.
7. Nasihatda  ishonarli naqliy va aqliy dalillar keltirish.
8. Kishining xato va kamchiliklari bo‘lsa, yotig‘i bilan tushuntirish;
9. Nasihatda kishining ijobiy tomonlarini ko‘rsatib o‘tish.
10. Nasihatning o‘rni va vaqtini topa bilish.
11. Ko‘pchilik orasida nasihat qilishdan tiyilish.
12. “Xudo xohlasa, hammasi yaxshi bo‘ladi”, deb yaxshi umid berish.

Xulosa qilib aytamizki, har tomonlama yaxshi niyatda, ta’sirchan uslubda, samimiyat bilan qilingan nasihat katta ajr-savoblarga sabab bo‘ladi. U insonlar o‘rtasida yomonlikni mavh qilib, yaxshilikni bardavom bo‘lishi uchun xizmat qiladi. 

Ruhiddin Akbarov,

O‘zbekiston musulmonlar idorasining

Qashqadaryo viloyati vakilligi xodimi