Islom moliyasi shartlariga rioya qilib sarmoya kiritish modeli o'z pullarini axloqiy va barqaror ishlatishga intiladigan investorlar uchun tabiiy jarayon va butun dunyoda BMTning Barqaror rivojlanish maqsadlariga erishishda yordam beradigan asosiy yo'l bo'lishi mumkin.

Islom moliyasi bugungi "foyda barcha narsadan ustun" degan qarashga boshqacha yondashadi. U xavfi oz bo'lgan moliyalashtirishni birinchi o'ringa qo'yadi va cho'chqa go'shti, alkogol va qimor kabi bozorlardan qochadi, foizlarni to'lashni taqiqlaydi va boshqaruvning axloqiy jihatlariga e'tibor beradi. Biroq bu muqobil sarmoyaviy yondashuv nafaqat o'sishga to'sqinlik qilmaydi, balki tez sur'atlar bilan rivojlanayotgan sohaga aylanmoqda, dedi Moody's ESG Solutions Group sheriklik va hamkorlik bo'yicha katta vitse -prezidenti Martina Makferson Arab News agentligiga bergan interv'yusida.

«Kelgusi o'n yillikda islom moliyasi mintaqa va aktivlar toifasi bo'yicha kengayishda davom etadi. Islom moliyasi va shariat talablariga muvofiq investitsiyalarni BMTning Barqaror rivojlanish maqsadlariga muvofiqlashtirish imkoniyati mavjud», degan u.

Barqaror rivojlanish maqsadlari BMT tomonidan 2030 yilga qadar butun jahonda 17 ta maqsadni amalga oshirish orqali adolatli va farovon, "hamma uchun yaxshiroq va barqaror kelajak uchun reja" sifatida ishlab chiqilgan. Islom moliyasining muqobil sarmoya modeli sifatida paydo bo'lishi bu maqsadlarga ikki yo'l bilan yordam beradi: barqaror va axloqiy imkoniyatlarni ochish va tavakkalchilikni kamaytirish.

"Barqaror rivojlanish maqsadlari va islom moliyasi umumiy qadriyatlar va mushtarak tamoyillarga ega", degan Martina Makferson. "Ular axloqiy jihatdan bog'langan, aktivlar bilan ta'minlangan, xavf va imkoniyatlarni boshqarishga qaratilgan va yaxshi boshqaruv va manfaatdor tomonlarning ta'siriga qaratilgan."

Saudiya Arabistonining 2030 yilgi rejasi bo'yicha barqaror rivojlanishning asosiy maqsadlaridan biri iqlim o'zgarishiga qarshi kurashishdir va bu "Islom moliyasining Barqaror rivojlanish maqsadlari bilan muvofiqlashtirishning asosiy yo'nalishlaridan biridir", degan Makferson.

azon.uz