Ulamolar tashrifi mo'min-musulmonlarga manzur bo'lmoqda
Avval xabar berganimizdek, ayni kunda yurtimiz bo'ylab ulamolarimizning diniy-ma'rifiy suhbatlari Toshkent viloyatida davom etmoqda.
Bugun, 8 iyun' kuni O'zbekiston musulmonlari idorasi raisi o'rinbosari Ibrohimjon domla Inomov Bekobod shahridagi “Qora mozor” jomesiga tashrif buyurib, masjid yangi binosi qurilishi bilan tanishib, yig'ilganlar bilan ma'rifiy suhbat qurdilar. Jumladan, ularda yurtimizda amalga oshirilayotgan xayrli islohotlar, bugungi kundagi dolzarb masalalar bo'yicha ma'ruza qildilar. Bundan hudud ahli mamnun bo'lib, minnatdorligini izhor qilmoqdalar.
Shuningdek, Toshkent shahar bosh imom xatibi o'rinbosari Abduqahhor domla Yunusov Bekobod shahridagi “No''mon ibn Sobit” jomesida, Toshkent shahridagi “Imom Termiziy” masjidi imom-xatibi Ishoqjon domla Begmatov Bekobod tumani "Dalvarzin" jome masjidida yig'ilganlarga bugungi kundagi dolzarb masalalar bo'yicha ma'ruzalar qilib berdilar va namozxonlarni qiziqtirgan savollarga javob berdilar.
Ana shunday ma'rifiy uchrashuvlarni Bekobod tuman “Turkman” jome masjidida Toshkent shahar Chilonzor tumani bosh imom-xatibi Ergashali domla Rustamov, Bekobod tumani “Mulla Mamatqul” jome masjidida Yangiyo'l tumani bosh imom-xatibi Qamariddin domla, Bekobod tuman “Hos” jomesida Toshkent shahar “Kamoliddin Orif al-Buxoriy” masjidi imom-xatibi Zakariyo domla Hafizullayev, Bekobod tumani "Nayman" masjidida Toshkent shahar “Hazrati Imom” masjidi imom-xatibi Habibulloh domla Abdurazzoqov, Bekobod shahar “O'zbekiston” jome masjidida Toshkent shahar “Rakat” jome masjidi imom-xatibi Rabbimqul domla Muhammadiyevlar ham o'tkazdilar.
Toshkent viloyat vakilligi matbuot xizmati
Luqmoni Hakimning hikmatli so‘zlaridan
1. Allohga taqvo qilishni tijorat deb bil, shunda u senga molsiz foyda keltiradi.
2. O‘zingni senga muhtoj bo‘lmagan, lekin sen unga muhtoj bo‘lgan kishining o‘rniga qo‘y.
3. Xarsang toshlarni joyidan ko‘chirish, ongsiz odamga anglatishdan osonroqdir.
4. Jannatni talab qilishda oliy himmatli bo‘l.
5. Allohdan shunday umid qilki, u bilan Uning makridan omonda bo‘lma va Allohdan shunday qo‘rqki, u bilan Uning rahmatidan umidsiz bo‘lma.
6. Men hech qachon sukutdan afsuslanmadim. Agar gap kumush bo‘lsa, sukut — oltin.
7. Hikmat kambag‘allarni podsholarning majlislarida o‘tkazgan.
8. “Yo Robbim, meni mag‘firat qil” — deb ko‘p takrorla, zero Allohning bir soati borki, u vaqtda so‘rovchi rad etilmaydi.
9. Kim yolg‘on gapirsa, yuzining suvini (obro‘yi) ketadi, kimning xulqi yomon bo‘lsa, g‘am-tashvishi ko‘payadi.
10. Allohdan qo‘rq, lekin qalbing fojir bo‘laturib, odamlar seni hurmat qilishlari uchun o‘zingni ularga Allohdan qo‘rqadigan qilib ko‘rsatma.
11. Amal faqat yaqiniy ishonch (e’tiqod) bilangina mukammal bo‘ladi, kimning e’tiqodi zaif bo‘lsa, amali ham zaif bo‘ladi.
12. Yolg‘on gapirishdan ehtiyot bo‘l, zero u pishirilgan chumchuq go‘shti kabi ishtahalidir, lekin ko‘p o‘tmay egasini ichini yondiradi.
13. Majlisni ko‘zing bilan ko‘rib tanla, agar Alloh zikr qilinadigan majlis bo‘lsa, u yerda o‘tir. Agar olim bo‘lsang, ilming naf beradi, agar johil bo‘lsang, senga o‘rgatishadi, agar Alloh u majlisga rahmatini nozil qilsa, sen ham shu rahmatdan bahramand bo‘lasan.
14. Qarzdorlikdan ehtiyot bo‘l, chunki u kunduzi xorlik va tunda g‘amdir.
15. To‘qlik ustiga ovqat yemagin — chunki unday taomni yegandan ko‘ra itga tashlagan yaxshiroq.
16. Agar shayton senga shubha va gumon orqali kelsa, uni yaqiniy ishonch va nasihat bilan yeng, agar u tanballik va zerikish tomonidan kelsa, qabr va qiyomatni eslab yeng, agar u xohish va qo‘rquv tomonidan kelsa, unga dunyo tark etiladigan va qoldiriladigan narsadir, deb ayt.
17. Tilingdan chiqqan gaplarga ehtiyot bo‘l, sukut qilgan kishi omonda bo‘ladi, faqat foydasi bor gaplarni gapir.
18. Yuzingni niqoblashdan (ya’ni shubhali qiyofadan) saqlan — chunki, u kechasi odamlarni qo‘rqitadi, kunduzi esa xo‘rlik keltiradi.
19. Men tosh, temir va og‘ir yuklarni ko‘tardim, ammo yomon qo‘shnidan og‘irroq narsani ko‘rmadim.
Homidjon qori ISHMATBЕKOV