Vakilimiz xalqaro Qur'on musobaqasida qatnashmoqda
Shu yil 8 noyabr' kuni Kuvayt shahrida boshlangan XII xalqaro Qur'oni karim musobaqasida 70 mamlakat vakillaridan iborat 120 dan ortiq qori o'zaro bellashmoqda. Musobaqa 15 noyabrda yakuniga etadi.
Musobaqa quyidagi yo'nalishlarda o'tkazilmoqda:
- Qur'oni karimni o'n xil qiroatda mukammal yoddan o'qib berish;
- Qur'oni karimni tajvid qoidasi asosida to'liq yoddan o'qish;
- Qur'oni karimni mashhur qorilar uslubida chiroyli tilovat qilib berish;
- Yosh qorilar o'rtasida Qur'oni karimni tajvid qoidasi asosida to'liq yoddan o'qish;
- Qur'oni karimni o'rgatishga xizmat qilishga eng yaxshi texnik loyihani taqdim etish.
Mazkur nufuzli musobaqada vakilimiz “Ko'kaldosh” islom bilim yurti talabasi Abdulhay qori Hasanov Qur'oni karimni tajvid qoidasi asosidan to'liq yoddan o'qib berish bo'yicha qatnashib, saralash bosqichida hakamlar tomonidan berilgan savollarga javob berdi.
Yaratgan parvardigordan qorimizga ushbu nufuzli xalqaro musobaqada muvaffaqiyat va zafarlar ato etishini so'rab qolamiz.
Hozir Sizning e'tiboringizga Abdulhay qorining musobaqadagi tilovatini havola etamiz. Marhamat tinglang.
O'zbekiston musulmonlari idorasi
Matbuot xizmati
Surxondaryoda otinoyilar uchun seminar-trening o‘tkazildi
Joriy yilning 7-8 sentyabr kunlari Surxondaryo viloyatining Imom Termiziy xalqaro ilmiy-tadqiqot markazi majlislar zalida ikki kunlik o‘quv-seminari doirasida "Mafkuraviy xatarlarga qarshi kurashishda otinoyilarning o‘rni hamda mas’uliyati" mavzusida seminar-trening bo‘lib o‘tdi.
Tadbirda O‘zbekiston musulmonlari idorasi Surxondaryo viloyati vakilining xotin-qizlar bo‘yicha o‘rinbosari, viloyat hokimligi mutasaddilari hamda diniy soxa xodimlari ishtirok etishdi. Ishtirokchilarga seminarning ahamiyati, "Aqida ilmining moxiyati va moturidiylik ta’limoti", "Yot oqimlar g‘oyalariga raddiyalar" - Imom Moturidiy xalqaro ilmiy- tadqiqot markazi katta ilmiy xodimi I.Abduraxmonov, "Globallashuv asrida ayollarni g‘oyaviy taxdidlardan asrash" - Imom Moturidiy xalqaro ilmiy- tadqiqot markazi bo‘lim boshlig‘i Sh.Jo‘rayev hamda "Xotin-qizlar bilan ishlashda uslubiy tavsiyalar" - O‘zbekiston xalqaro islomshunoslik akademiyasi dots.nti D.Turdiyevalar mavzularida so‘z yuritdilar.
Seminar davomida bugungi kunda uchrayotgan mafkuraviy tahdidlar, ularning oldini olish, jamiyatda sog‘lom ma’naviy muhitni shakllantirish, ayniqsa xotin-qizlar o‘rtasida ma’rifiy faoliyatni kuchaytirishda otinoyilarning o‘rni va mas’uliyati haqida atroflicha ma’lumotlar berildi.
Shuningdek, ishtirokchilar bilan ochiq muloqot tashkil etilib, mavzu yuzasidan fikr va takliflar muhokama qilindi hamda qiziqtirgan savollarga mutaxassislar tomonidan javoblar berildi.
Seminar-trening o‘z ishini yakunladi.
O‘zbekiston musulmonlari idorasi Matbuot xizmati
