O'zbekiston musulmonlari idorasi tashabbusi bilan homiylar jalb etilgan holda, Nurota tumanidagi “Chuya” jome masjidining yangi binosi qurib foydalanishga topshirildi.
Bundan ikki yil oldin “Chuya” masjidining binosi eski holatga kelib qolgan, masjid jamoati uni obod qilish istagida edi. O'sha yili O'zbekiston musulmonlari idorasi raisi, muftiy Usmonxon Alimov hazratlari viloyatga tashriflari davomida ushbu masjidda bo'lib vaziyatni tezda anglab mutasaddilarga tegishli ko'rsatma bergan, uning qurilishiga xayrli duolar qilgan edilar.
Muftiy hazratlari boshchiligidagi jamoat duosi, diniy idora ko'magi, saxovatpesha insonlar himmati va mahalla ahlining hashari sababli ushbu masjid qurib bitkazilib foydalanishga topshirildi.
Shu munosabat bilan o'tkazilgan marosimda O'zbekiston musulmonlari idorasi Masjidlar bo'limi mas'ul xodimi Iskandar Halilov, viloyat hokimi o'rinbosari G'ofur Musulmonov, viloyat bosh imom-xatibi Tohir Ro'ziyev, Nurota tumani hokimi Umarbek Halilovlar ishtirok etdi.
Tadbirda so'zga chiqqan Iskandar domla Halilov ishtirokchilarga muftiy hazratlarining salom va tabriklarini etkazib, yig'ilganlarni masjidning yangi binosi bilan mubarokbod etdi. Shuningdek, marosimda so'z olgan mutasaddilar namozxonlarni yangi masjid bilan tabriklab, uning qurilishiga hissa qo'shgan insonlarga minnatdorlik bildirdi.
Esalatib o'tamiz, O'zbekiston musulmonlari idorasi tomonidan yurtimizning olis hududlarida masjidlar bunyod etilayotgani haqida xabar bergan edik.
Darhaqiqat, Allohning uyi bo'lgan masjid qurishning savobi ulug' ekani mo''tabar manbalarda bayon etilgan.
Qur'oni karimda marhamat qilinadi: “Allohning masjidlarini faqat Allohga va oxirat kuniga iymon keltirgan, namozni to'kis ado etgan, zakotni (haqdorlarga) ato qilgan va yolg'iz Allohdangina qo'rqadigan zotlargina obod qilurlar. Ana o'shalar hidoyat topuvchi zotlar bo'lsalar ajabmas” (Tavba surasi, 18-oyat).
Hazrati Payg'ambarimiz sollallohu alayhi vasallamning hadislarida ham masjid qurish va uni obod qilish borasida ko'plab targ'iblar kelgan. Hazrati Usmon ibn Affon roziyallohu anhudan rivoyat qilinadi, Nabiy alayhissalom shunday dedilar: “Kim Alloh uchun bir masjid qursa, Alloh jannatda shuning mislicha uy bunyod qiladi” (Muttafaqun alayh).
Anas ibn Molik roziyallohu anhudan bunday rivoyat qilingan: “Kim masjidda bitta chiroq yoqsa, o'sha chiroqning nuri o'chgunicha farishtalar u kishining haqqiga istig'for aytib turadilar”.
Alloh taolo masjid qurish va uni obod etish mana shunday ulug' savobli amal ekanini chin qalbidan his etgan muxlis xalqimizga ajru mukofotini ko'paytirib bersin, bu kabi xayrli ishlar bardavom qilib, yurtimiz va butun dunyodan balo va ofatlarni aritsin.
O'zbekiston musulmonlari idorasi matbuot xizmati
Shu yil 24 mart kuni Andijon, Farg‘ona va Namangan viloyatlaridan saralab olingan guruh rahbarlari uchun maxsus o‘quv seminari bo‘lib o‘tdi. Ushbu tadbir “Haj – 2026” mavsumini yuqori saviyada, namunali va tartibli tashkil etish, ziyoratchilarimizga munosib sharoitlar yaratish maqsadida tashkil etildi.
O‘quv mashg‘ulotlarini Namangan viloyati bosh imom-xatibi Abdulloh domla Samadov, Din ishlari bo‘yicha qo‘mita bo‘lim boshlig‘i Bobomurod Rustamov va O‘zbekiston musulmonlari idorasi Haj va umra tadbirlarini tashkil etish markazi direktori Maqsud Karimov olib borishdi.
Yig‘ilish davomida notiqlar guruh rahbarlariga yaqinlashib kelayotgan haj mavsumining tashkiliy ishlari, unga doir eng muhim vazifalar va mas’uliyatli jihatlari alohida tushuntirib o‘tildi. Xususan, ziyoratchilarga Islomning beshinchi rukni bo‘lgan haj ibodatiga puxta tayyorgarlik ko‘rish, haj amallarini ado etishning tartib-qoidalari va muborak qadamjolarni ziyorat qilish odoblari xususida so‘z yuritildi.
Shuningdek, soha mutasaddilari guruh rahbarlariga haj safariga doir amaldagi qonunchilik va boshqa me’yoriy hujjatlarni ham puxta bilish, ziyoratchilar bilan ishlashda doimo xushmuomala bo‘lish, o‘zaro yordam muhitini shakllantirish muhimligiga urg‘u qaratishdi.
Seminar yakunida ishtirokchilarni qiziqtirgan savollarga atroflicha javob berildi. Shuningdek, kelgusida Fatvo markazi ulamolari bilan haj ibodatiga oid shar’iy masalalar bo‘yicha dars mashg‘ulotlari olib borish reja qilindi.
O‘zbekiston musulmonlari idorasi
Matbuot xizmati