Imom Buxoriy xalqaro ilmiy-tadqiqot markazida Prezidentimizning Oliy Majlisga Murojaatnomasi mazmun-mohiyati va unda ilgari surilgan tashabbuslarni xalqimizga etkazish maqsadida tadbir o'tkazildi.

Unda markaz jamoasi, Hadis ilmi maktabi o'qituvchi va talabalari hamda O'zbekiston xalqaro islom akademiyasi huzuridagi malaka oshirish markazi Samarqand mintaqaviy filiali tinglovchilari ishtirok etdi.

O'zbekiston davlat san'at va madaniyat instituti rektori Ibrohim Yo'ldoshev va Samarqand davlat chet tillar instituti rektori Ilhom To'xtasinov so'nggi yillarda yurtimizda amalga oshirilayotgan keng ko'lamli islohotlar, fan-ta'lim, madaniyat, tibbiyot sohalarini rivojlantirish, iqtisodiy barqarorlikni ta'minlash bo'yicha olib borilayotgan ishlar haqida so'z yuritdi. Ushbu yo'nalishlarda erishilayotgan yutuqlar hayotiy misollar bilan tushuntirildi.

Prezidentimizning Oliy Majlisga yo'llagan Murojaatnomasi ham ushbu ezgu sa'y-harakatlarning mantiqiy davomi bo'lgani, unda ilgari surilgan taklif va tashabbuslar yurtimiz taraqqiyotiga xizmat qilishi e'tirof etildi.

– Davlatimiz rahbari Murojaatnomada kalom ilmining asoschisi, buyuk mutakkallim Abu Mansur Imom Moturidiy hazratlarining “Tiriklik hikmatini sog'liqda, deb bilgin”, degan chuqur ma'noli hikmatlarini yodga oldilar, - dedi Imom Buxoriy xalqaro ilmiy-tadqiqot markazi direktori Sh.Ziyodov. - Dunyo xalqlarini larzaga solgan koronavirus pandemiyasi davrida bu hikmatning nechog'li ahamiyatga ega ekanligini xalqimiz chuqur his etdi. Albatta, xalqimizga, yoshlarimizga ajdodlarimizning kimligini tanitsak, ularning ilmiy merosini chuqur o'rgatsak, ularning orasidan adashganlar chiqmaydi. Aksincha, yurtimizni yanada taraqqiy ettirishga munosib hissa qo'sha oladigan etuk kadrlar, ulug' allomalarimizga munosib vorislar etishib chiqadi.

Tadbir doirasida Prezidentimiz tomonidan Murojaatnomada ilgari surilgan eng muhim tashabbuslar aks etgan videorolik namoyish etildi.

G'.Hasanov, O'zA