Oyna – mening eng yaxshi do'stim. Chunki yig'lagan paytim u hech qachon kulmaydi.
Ch.Chaplin
***
Kimki, yolg'on so'zni birovga to'nkar,
O'z qora yuzini yog'ga bulaydi.
Ozgina yolg'on ham ulug' gunohdir,
Ozgina zahar ham halok qiladi.
Hazrati Alisher Navoiy
***
Allohga oltin to'la sandig'ing emas, iymon to'la qalbing muhim.
Sayyid Abror Umar
***
Har narsaning me'yori yaxshi. Odobning esa ortig'i.
Shams Tabriziy
***
Havoyi nafsiga ergashgan insonning yo'li azobli halokat bilan yakunlanadi.
Ko'rdimki, dunyoni yaxshi ko'rgan odamlarga shayton sulton bo'lar ekan.
Shayx Najmiddin Kubro
***
Muallim savol qildi:
– Bolalar, agar Alloh hammamizning jannatga kirishimizni istasa, nega bu dunyoga yubordi?
– Bir o'quvchi o'rnidan turib javob berdi:
– Muallim siz ham hammamizning a'lo baholar bilan sinfdan sinfga ko'chishimizni istaysiz, ammo nega imtihon qilasiz. Barchamizga birday besh baho qo'yib chiqmaysiz?!
***
Soxta mulozamat hiyonatdan darak beradi.
Tarix muhrlagan so'zlar
***
Fasod bir ilondir, boshin darhol ez,
Fasodchining ishi oxiri barbod.
Alloh fasodchini yomon ko'radi:
“Vallohu la yuhibbul fasad…”
“Hikmat yog'dulari” kitobidan
***
“Bas, albatta, har bir qiyinchilik bilan birga engillik bordir. Albatta, har bir qiyinchilik bilan birga engillik bordir”.
Sharh surasi, 5-6 oyat
***
Manbalar asosida Saidabror Umarov tayyorladi
Abu Qatoda roziyallohu anhudan rivoyat qilinadi:
«Rasululloh sollallohu alayhi vasallamning oldilaridan bir janoza olib o‘tildi, shunda u zot alayhissalom: "Tin oluvchi va undan tin olinuvchi", dedilar.
"Yo Allohning Rasuli, tin oluvchi va undan tin olinuvchi nima?" deyishdi.
U zot alayhissalom: "Mo‘min banda (vafot etsa) dunyoning qiyinchiliklaridan istirohat oladi. Fojir banda (o‘lsa) undan bandalar, elu yurtlar, dov-daraxtlar va jonzotlar qutuladilar", dedilar» (Imom Buxoriy va imom Muslim rivoyati).
Abdulloh ibn Umar roziyallohu anhumodan rivoyat qilinadi:
«Rasululloh sollallohu alayhi vasallam: "Birortangiz vafot etganida unga o‘rni ertayu kech ko‘rsatib turiladi: agar jannat ahlidan bo‘lsa, jannat ahlidan ekani, do‘zax ahlidan bo‘lsa, do‘zax ahlidan ekani. "Alloh seni qiyomat kuni qayta tiriltirgunicha sening o‘rning mana shudir", deyiladi", dedilar» (Imom Buxoriy va imom Muslim rivoyat qilishgan).