Ko'zni zinodan saqlash
Alloh taolo: «Sen mo'minlarga ayt, ko'zlarini tiysinlar...», dedi (Nur surasi, 30- oyat).
Huzayfa roziyallohu anhudan rivoyat qilinadi:
«Rasululloh sollallohu alayhi vasallam:
«Nazar solish shaytonning zaharli o'qlaridan biridir. Kim Allohdan qo'rqib, uni tark qilsa, Alloh azza va jalla unga qalbida halovatini topadigan iymon beradi», dedilar» (Imom Hokim rivoyat qilgan).
1. Ko'zni haromdan saqlash qalbni gunohkorlik alami va azobidan saqlaydi.
2. Ko'zni haromdan saqlash qalbda taqvoni ko'paytiradi.
3. Ko'zni haromdan saqlash ko'zlarni va yuzni munavvar qiladi.
4. Ko'zni haromdan saqlash ilm yo'llarini onsonlashtiradi, qalbdagi nur vositasida haqdan botilni ajrata oladi.
5. Ko'zlarni haromdan saqlash qalbga quvvat, sobitlik va shajoat beradi. Qo'rqishga loyiq bo'lgan Zot faqat Alloh ekanligi hissini kuchaytiradi.
6. Haromga qaramaslik shahvatga asir bo'lishdan asraydi va qalbga yorug'lik, surur bag'ishlaydi.
7. Ko'zlarni haromdan saqlash jahannam eshiklaridan birini yopadi va bandaning Allohga do'st bo'lish darajasini ko'taradi.
8. Haromga qaramaslik aqlni quvvatlantiradi. Amallarning oqibatini o'ylamaslik esa aqlning zaiflashishiga olib keladi.
9. Ko'zni haromdan saqlash qalbni g'aflat botqog'idan saqlaydi. Haromga qarash banda bilan jannat o'rtasida parda hosil qiladi.
10. Ko'zni haromdan Allohning amriga itoat qilish niyati bilan saqlasa, banda bu dunyoda ham, oxiratda ham ulug' saodatga erishadi.
11. Haromdan ko'zni saqlash zaharli o'qning qalbga qadalishiga va shaytonning qalbga kirishiga to'sqinlik qiladi.
12. Ko'zni haromdan saqlash qalbga jannatga olib boruvchi amallar bilan mashg'ul bo'lish istagini beradi...
Muhammad Ali Muhammad Yusuf
Samimiy muloqot – muammolar yechimiga yo‘l
O‘zbekiston musulmonlari idorasi rahbariyatining aholi bilan ochiq va samimiy muloqotlari fuqarolar murojaatlarini o‘rganish hamda ularni hal etishda muhim ahamiyat kasb etmoqda.
Bugun, 16 sentyabr kuni O‘zbekiston musulmonlari idorasi raisining birinchi o‘rinbosari Homidjon domla Ishmatbekov Diniy idoraga kelgan bir guruh fuqarolarni qabul qilib, ularning murojaat, arz va takliflarini tingladilar.
Muloqot davomida imomlar faoliyatini yanada takomillashtirishga oid takliflar ko‘rib chiqildi. Shuningdek, ustozdan xayrli duo olish niyatida kelganlar, o‘zlari yozgan kitoblarini taqdim etganlar ham bo‘ldi. Moddiy yordam so‘rab murojaat qilgan fuqarolarga esa belgilangan tartibda tegishli ko‘mak ko‘rsatildi.
Samimiy qabul va ko‘rsatilgan e’tibordan mamnun bo‘lgan fuqarolar minnatdorlik bildirib, xayrli duolar qilishdi.
Darhaqiqat, inson dardiga sherik bo‘lish, uning tashvishini yengillatish — savobi ulug‘ amaldir.
Rasululloh sollallohu alayhi va sallam marhamat qilganlar:
«Kim birodarining hojatini ravo qilsa, Alloh uning hojatini ravo qiladi. Kim bir musulmonning tashvishini aritsa, Alloh uning Qiyomat kunidagi tashvishlaridan birini aritadi» (Imom Buxoriy rivoyati).
Eslatib o‘tamiz, bunday qabullar O‘zbekiston musulmonlari idorasining hududiy vakilliklari hamda barcha jome masjidlarida har chorshanba kuni imom-domlalar tomonidan muntazam o‘tkazib kelinmoqda.
O‘zbekiston musulmonlari idorasi
Matbuot xizmati
