Islom hamkorlik tashkilotiga a'zo davlatlar uchrashuvi o'tkaziladi
Shu yil 27-28 noyabr' kunlari Niger poytaxti Niamey shahrida “Tinchlik va taraqqiyot yo'lida terrorizmga qarshi kurashda ahdlashuv” mavzusida Islom hamkorlik tashkiloti Bosh kotibiyati tashqi ishlar vazirlari kengashining 47-sessiyasi o'z ishini boshlaydi.
Tashkilot Bosh kotibi doktor Yusuf bin Ahmed al-Usaymin 47-sessiyaning kun tartibiga islom dunyosi dolzarb mavzu va masalalar, jumladan, islomofobiyaga qarshi kurashish va dinlar sha'niga bildirilayotgan salbiy fikrlarga barham berish bo'yicha hamkorlik qilish hamda tashkilotga a'zo bo'lmagan davlatlardagi musulmon jamiyatlari ahvoli haqidagi masalalar muhokama qilinishini ta'kidladi.
Shuningdek, Halqaro Sud mahkamasida rohinjalar to'g'risidagi masalani o'rganish, madaniyat va dinlar o'rtasidagi muloqotni mustahkamlash va “IHT 2025” ish dasturida erishilgan yutuqlarga oid mavzular muhokama etiladi.
Halqaro aloqalar bo'limi xodimi
Ilyosxon Ahmedov tayyorladi.
Duolar ijobati halol luqma bilan
“Alloh taolo bandasining halol ortidan quvib holdan toygan holida ko‘rishni yaxshi ko‘radi” (Imom Suyutiy rivoyati).
* * *
“Albatta, Alloh taolo sizlarning shifongizni sizlarga harom bo‘lgan narsada qilgan emas!” (Imom Tabaroniy va Imom Bayhaqiy rivoyati).
* * *
“Kishining og‘ziga tuproq solishi harom luqma solishidan yaxshiroqdir”
(Imom Ahmad ibn Hanbal rivoyati).
* * *
Rasululloh sollallohu alayhi va sallam aytdilar: “Haromdan oziqlangan hech bir jasad jannatga kirmaydi”(Imom Abu A’lo rivoyati).
Duoning qabul bo‘lishi uchun ikkita sabab lozim. Birinchisi, halol luqmadir.
Sa’d ibn Abu Vaqqos roziyallohu anhu Rasululloh sollallohu alayhi va sallamning huzurlariga kelib, duosi qabul bo‘lmaganidan arz qilganida, u zot: “Ey Sa’d, haromdan uzoq bo‘lgin! Chunki kimning qorniga harom luqma kirsa, uning duosi qirq kungacha ijobat bo‘lmas”, dedilar.
Yahyo ibn Muoz aytadi: “Ibodat Alloh xazinalaridan biridir. Bu xazinaning kaliti esa duodir. Bu kalitning tishlari esa halol kasb va halol luqmadir”.
Rasululloh sollallohu alayhi va sallam aytdilar: “Ayrim kishilar Allohning moliga nohaq sho‘ng‘iydilar. Qiyomat kunida ularga do‘zax bo‘lur” (Imom Buxoriy rivoyati).
Payg‘ambar sollallohu alayhi va sallam yana aytganlar: «Bir kishi uzoq safar qiladi, sochi to‘zg‘ib, ust-boshi chang bo‘ladi. Qo‘llarini osmonga cho‘zib: “Ey Rabbim, ey Rabbim”, deydi. Holbuki, yegani harom, ichgani harom, kiygani harom va haromdan oziqlangan. Bas, uning duosi qanday ijobat bo‘lsin?!» (Imom Muslim rivoyati).
Nigora MIRZAYEVA, to‘pladi.
“Hidoyat” jurnalining 2025 yil 9-sonidan
