Samarqand viloyatidagi Imom Buxoriy majmuasida 10 ming o'rinli masjid quriladi. Bu haqda qurilish vaziri Botir Zokirov «O'zbekiston 24» telekanalida bergan ma'lumotiga tayanib, kun.uz manbasi xabar berdi. Vazirlik vakillari loyihani prezident Shavkat Mirziyoevga topshirishgan. Zokirovning aytishicha, bu to'rtinchi taqdimot bo'lgan va prezident tomonidan loyihani boshlash bo'yicha topshiriq berilgan.
Qurilish vazirining so'zlariga ko'ra, majmuada atrofi milliy uslubdagi ayvonlar bilan o'ralgan 10 ming o'rinli masjid quriladi. Vazirlik masjid va uning atrofidagi qurilish ishlarini boshlash bo'yicha ko'rsatma olgan.
Payariq tumani hududida joylashgan Imom Buxoriy majmuasi hududida hozir ham masjid faoliyat olib boradi. Loyihaga ko'ra, shu masjid o'rniga kattaroq va zamonaviy uslubda qurilishi rejalashtirilmoqda.
Shuningdek, majmuaning o'zi ham qaytadan barpo etiladi. Ayni damda majmuaning yonida Imom Buxoriy nomidagi hadis maktabi ham faoliyat yuritmoqda.
Ma'lumot uchun, Imom Buxoriy Islom olamining etuk muhaddisi hisoblanadi. Uni muhaddislar imomi deb atashadi. Imom Buxoriyning «Sahihi Buxoriy» sahih hadislar to'plami Islom olamida eng ishonchli hadis manbasi sifatida o'rganiladi. Imom Buxoriy milodiy 810 yilda Buxoroda tug'ilgan. 870 yilda esa hozirgi maqbarasi joylashgan Samarqand hududidagi Hartang qishlog'ida vafot etgan.
islom.uz
Abu Qatoda roziyallohu anhudan rivoyat qilinadi:
«Rasululloh sollallohu alayhi vasallamning oldilaridan bir janoza olib o‘tildi, shunda u zot alayhissalom: "Tin oluvchi va undan tin olinuvchi", dedilar.
"Yo Allohning Rasuli, tin oluvchi va undan tin olinuvchi nima?" deyishdi.
U zot alayhissalom: "Mo‘min banda (vafot etsa) dunyoning qiyinchiliklaridan istirohat oladi. Fojir banda (o‘lsa) undan bandalar, elu yurtlar, dov-daraxtlar va jonzotlar qutuladilar", dedilar» (Imom Buxoriy va imom Muslim rivoyati).
Abdulloh ibn Umar roziyallohu anhumodan rivoyat qilinadi:
«Rasululloh sollallohu alayhi vasallam: "Birortangiz vafot etganida unga o‘rni ertayu kech ko‘rsatib turiladi: agar jannat ahlidan bo‘lsa, jannat ahlidan ekani, do‘zax ahlidan bo‘lsa, do‘zax ahlidan ekani. "Alloh seni qiyomat kuni qayta tiriltirgunicha sening o‘rning mana shudir", deyiladi", dedilar» (Imom Buxoriy va imom Muslim rivoyat qilishgan).