— Mahallamizga odam sochlar evaziga oshxona buyumlarini almashadigan odamlar keladi. Biz uyda to'planib qolgan sochlarimizni berib, o'sha buyumlardan olganmiz. Lekin o'g'lim, bunday qilish gunoh, deyapti. Bu haqda shariatimizda nima deyilgan?

— Shariatimizda odam a'zolarining savdosidan qattiq qaytarilgan. Agarchi u o'lik tana yoki kesib olingan soch yoki tirnoq bo'lsa ham. Odam a'zosi qanday holda bo'lmasin uning savdosi nojoizdir. Shu o'rinda bozorlarda keng ko'lamda sotilayotgan “parik”larning hukmi ham nima bo'lishi haqida ham savol kelib chiqadi. Agar parik odam sochidan tayorlangan bo'lsa, (ba'zilari shunday ham ekan) uni taqish yuqorida aytib o'tganimizdek, mumkin emas. Agar bemorlik yoki biror sababdan sochi to'kilgan bo'lsa ham. Agar sun'iy narsalardan yoki hayvonlar yungi yoki junlaridan bo'lsa, ulamolar bunga ruxsat bergan.

Raddul muxtor sohibi Ibn Obidin (inson sochi) so'zining davomida “Inson sochidan foydalanish umuman joiz emas. Bu Nabiy sollallohu alayhi vasallamning: “Alloh ulama qiluvchi ayolni ham, ulama qildiruvchi ayolni ham la'natlasin”, degan hadislariga binoandir. Ayollar sochlarining o'rimlarini ziyoda qilishi uchun tuyaning yungidan ulab olsalar joiz” degan.

Muhammad Ayyub HOMIDOV