Chernogoriyaga 50 ming nusxa Qur'on hadya qilindi
Saudiya Arabistoni Islom ishlari, da'vat va irshod vazirligi Chernogoriya Islom ishlari bo'yicha boshqarmasiga Qur'oni karim oyatlari ma'nolarining bosniya va alban tillariga izohli tarjimalari bilan birga 50 000 nusxadagi Qur'on kitobini sovg'a qildi. Bu haqda “IQNA” sayti xabar qildi.
Qur'oni karim ma'nolarining bosniya va alban tillariga tarjimalari Chernogoriya islom ishlari boshqarmasi boshlig'i Rafat Vesichga taqdim etildi.
Marosimda Saudiya Arabistonining Chernogoriyadagi elchisi va Saudiya Arabistonining Bosniya va Gertsegovinadagi elchixonasining diniy attashesi ham ishtirok etdi.
Saudiya Arabistonining Chernogoriyadagi norezident elchisi Faysal Hefziy o'z nutqida ushbu xayrli ishni Saudiya Arabistoni Podshohligining Islom va Qur'onga xizmat qilish majburiyatining ramzi, deya baholadi.
Mazkur xayrli ish Qur'onning turli xil nusxalarini turli mamlakatlarda tarqatish bo'yicha amalga oshirgan dasturning bir qismidir. Uning doirasida dunyo bo'ylab millionlab Qur'oni karim nusxalarini tarqatadi va uning ma'nolarini 77 dan ortiq xalqaro tilga tarjima qilish bo'yicha faoliyat olib boradi.
O'zbekiston musulmonlari idorasi
Matbuot xizmati
Luqmoni Hakimning hikmatli so‘zlaridan
1. Allohga taqvo qilishni tijorat deb bil, shunda u senga molsiz foyda keltiradi.
2. O‘zingni senga muhtoj bo‘lmagan, lekin sen unga muhtoj bo‘lgan kishining o‘rniga qo‘y.
3. Xarsang toshlarni joyidan ko‘chirish, ongsiz odamga anglatishdan osonroqdir.
4. Jannatni talab qilishda oliy himmatli bo‘l.
5. Allohdan shunday umid qilki, u bilan Uning makridan omonda bo‘lma va Allohdan shunday qo‘rqki, u bilan Uning rahmatidan umidsiz bo‘lma.
6. Men hech qachon sukutdan afsuslanmadim. Agar gap kumush bo‘lsa, sukut — oltin.
7. Hikmat kambag‘allarni podsholarning majlislarida o‘tkazgan.
8. “Yo Robbim, meni mag‘firat qil” — deb ko‘p takrorla, zero Allohning bir soati borki, u vaqtda so‘rovchi rad etilmaydi.
9. Kim yolg‘on gapirsa, yuzining suvini (obro‘yi) ketadi, kimning xulqi yomon bo‘lsa, g‘am-tashvishi ko‘payadi.
10. Allohdan qo‘rq, lekin qalbing fojir bo‘laturib, odamlar seni hurmat qilishlari uchun o‘zingni ularga Allohdan qo‘rqadigan qilib ko‘rsatma.
11. Amal faqat yaqiniy ishonch (e’tiqod) bilangina mukammal bo‘ladi, kimning e’tiqodi zaif bo‘lsa, amali ham zaif bo‘ladi.
12. Yolg‘on gapirishdan ehtiyot bo‘l, zero u pishirilgan chumchuq go‘shti kabi ishtahalidir, lekin ko‘p o‘tmay egasini ichini yondiradi.
13. Majlisni ko‘zing bilan ko‘rib tanla, agar Alloh zikr qilinadigan majlis bo‘lsa, u yerda o‘tir. Agar olim bo‘lsang, ilming naf beradi, agar johil bo‘lsang, senga o‘rgatishadi, agar Alloh u majlisga rahmatini nozil qilsa, sen ham shu rahmatdan bahramand bo‘lasan.
14. Qarzdorlikdan ehtiyot bo‘l, chunki u kunduzi xorlik va tunda g‘amdir.
15. To‘qlik ustiga ovqat yemagin — chunki unday taomni yegandan ko‘ra itga tashlagan yaxshiroq.
16. Agar shayton senga shubha va gumon orqali kelsa, uni yaqiniy ishonch va nasihat bilan yeng, agar u tanballik va zerikish tomonidan kelsa, qabr va qiyomatni eslab yeng, agar u xohish va qo‘rquv tomonidan kelsa, unga dunyo tark etiladigan va qoldiriladigan narsadir, deb ayt.
17. Tilingdan chiqqan gaplarga ehtiyot bo‘l, sukut qilgan kishi omonda bo‘ladi, faqat foydasi bor gaplarni gapir.
18. Yuzingni niqoblashdan (ya’ni shubhali qiyofadan) saqlan — chunki, u kechasi odamlarni qo‘rqitadi, kunduzi esa xo‘rlik keltiradi.
19. Men tosh, temir va og‘ir yuklarni ko‘tardim, ammo yomon qo‘shnidan og‘irroq narsani ko‘rmadim.
Homidjon qori ISHMATBЕKOV