Ramazon hayitini qanday o'tkazamiz?
Bismillahir Rohmanir Rohiym
1. Ramazon hayitiga o'tar kechani bedor o'tkazish.
Hayit kuniga o'tar kechani Qur'on tilovati, zikr, tasbeh va nafl namozlar bilan o'tkazish ulkan savoblarga sabab bo'ladi. Rasululloh sollalohu alayhi vasallam: “Kim ikki iyd kechalarini Allohdan savob umidida qoim qilsa, qalblar o'ladigan kunda uning qalbi o'lmas”, deganlar (Ibn Moja, Tabaroniy rivoyati).
2. G'usl qilish.“Rasululloh sollallohu alayhi vasallam fitr, azho va arafa kunlari g'usl qilar edilar”(Ibn Moja rivoyati).
3. Eng yaxshi, yangi yoki toza kiyimlarni kiyib, xushbo'ylanish. Payg'ambarimiz sollallohu alayhi vasallam hayit namoziga chiroyli to'nlarini kiyib chiqardilar.
4. Hayit namoziga chiqishdan oldin biror narsa tanovul qilish.“Rasululloh sollallohu alayhi vasallam fitr kuni bir nechta xurmo tanovul qilib chiqardilar. Toq er edilar” (Imom Buxoriy va Imom Termiziy rivoyati).
5. Masjidga imkon qadar piyoda va ertaroq borish.“Rasululloh sollallohu alayhi vasallam ikki hayit namoziga piyoda yurib chiqardilar” (Ibn Moja rivoyati).
6. Masjidga etib etguncha “Laa ilaha illalloh” va “Allohu akbar” kabi zikrlarni aytib borish.
7. Hayit namozidan oldin boshqa biror nafl namoz o'qimaslik.Masjidga borgandan so'ng tahiyyatul masjid yoki boshqa biror nafl namoz o'qilmaydi, balki zikr qilib o'tiriladi.
8. Namozga bir ko'chadan borib, boshqasidan qaytish. Nabiy sollallohu alayhi vasallam shunday qilar edilar.
9. Hayit bilan muborakbod etish.Sahobalar: “Taqobbal Alloh minna va minkum (Alloh bizdan ham, sizdan ham qabul etsin)”, deb bir-birlarini bayram bilan tabriklashardi.
10. Ahli ayol va yosh bolalarni xursand qilish. Oilada bayram kayfiyatini paydo qilish, sovg'a-hadyalar ulashish kerak. Rasululloh sollallohu alayhi vasallam: “Sizlarning eng yaxshingiz o'z ahli ayoliga yaxshi munosabatda bo'lganingizdir”, deganlar (Imom Termiziy rivoyati).
11. Qavm-qarindosh, yosh ulug'larni ziyorat qilish.
12. Tanish-bilish, yoru do'st, qo'ni-qo'shnilarni bayram bilan tabriklash.
Alloh taolo tutgan ro'za, qilayotgan solih amal va duolaringizni husni qabul etsin! Ramazon hayitingiz muborak bo'lsin!
Davron NURMUHAMMAD
Imom-xatiblar o‘rtasida bilimlar bellashuvi o‘tkazildi
Mustaqilligimizning muqaddas 35 yilligi arafasida Toshkent viloyatida imom-xatiblari va imom noiblari o‘rtasida "ZAKOVAT" intellektual musobaqasi bo‘lib o‘tdi.
Viloyatning turli hududlaridan tashrif buyurgan 6 ta jamoa tarkibidagi soha vakillari o‘zlarining teran bilimi, mulohazakorligi va mantiqiy fikrlash qobiliyatini sinovdan o‘tkazdilar. Har bir savol nafaqat intellektual bilim, balki boy tariximiz, diniy-ma’rifiy qadriyatlarimiz va xalqimizning ma’naviy merosini yorqin aks ettirdi.
Murosasiz va qizg‘in kechgan bahs yakuniga ko‘ra g‘oliblar aniqlandi:
G‘olib jamoalar:
1-o‘rin — "Bilimdonlar" jamoasi
2-o‘rin — "Ziyolilar" jamoasi
3-o‘rin — "Faollar" jamoasi
Diniy soha vakillarining bu kabi sog‘lom raqobat va intellektual bellashuvlarda faol ishtirok etishi jamiyatda ma’rifat nurini yanada kengroq yoyilashiga xizmat qiladi.
G‘olib va ishtirokchilarni chin qalbdan tabriklaymiz!
Ilm-ma’rifat yo‘lidagi xayrli ishlariga Alloh taolo baraka bersin, mas’uliyatli faoliyatlarida kuch-g‘ayrat yor bo‘lsin!
Toshkent viloyati vakilligi
Matbuot xizmati
