Sayt test holatida ishlamoqda!
22 Noyabr, 2026   |   12 Jumadul soni, 1448

Toshkent shahri
Tong
05:56
Quyosh
07:14
Peshin
12:14
Asr
15:17
Shom
17:02
Xufton
18:18
Bismillah
22 Noyabr, 2026, 12 Jumadul soni, 1448

Baxt-saodat kaliti

13.04.2024   3363   5 min.
Baxt-saodat kaliti

Abon ibn Abu Ayyosh roziyallohu anhudan rivoyat qilinishicha, Anas roziyallohu anhu quyidagilarni aytgan: «Nabiy sollallohu alayhi va sallamga: “Ey Allohning Rasuli, meni duosi qabul bo'ladiganlardan qilib qo'ying”, dedim. U zot: “Ey Anas, kasbingni pok qilgin, duoing qabul bo'lur. Chunki bir odam bir luqma haromni og'ziga solsa, qirq kungacha duosi ijobat bo'lmaydi”, dedilar» (Imom Daylamiy rivoyati). Biz-chi? Kasbimizni pok qilyapmizmi? Afsuski, qanday qilib bo'lsayam to'rt-besh so'm topish ilinjida bo'lamiz. Uning iymonimizga, salomatligimizga zarari haqida o'ylab ham ko'rmaymiz. Shuning uchun ishlarimiz yurishmaydi, topgan-tutganimizda baraka yo'q.

Bundan besh-olti yil oldin bir odam masjidga kelib: “Domla, negadir ishlarim hech yurishmaydi, halovatim yo'q, bir duo qiling”, dedi. Jamoat bilan duo qildik. So'ng zikr, istig'for aytib yurishni maslahat berdik. Ko'p o'tmay haligi kishi yana keldi. “Sheriklarimning-ku, omadi chopib ketdi, meniki esa o'sha-o'sha: qora qozon arang qaynayapti”, deb nolidi. “O'zi nima ish qilasiz”, deb so'radik. “Bozorda dallolchilik qilaman”, dedi. Gap orasida tirikchilik vajidan yolg'on ishlatishini, bu esa kasbining talabi ekanini tushuntirdi. Hammasi oydinlashdi. “Qo'ying, bunday qilmang, aka, halol ish bilan shug'ullaning”, deb maslahat berdik.

Endi bildingizmi, nima uchun bu odamning ishi yurishmagan, omadi chopmagan? Boisi luqmani harom yo'l bilan topgan. Uni bola-chaqasiga edirgan. Zero, harom narsa oiladan ham barakani ketkazadi, duolarning qabul bo'lishiga to'sqinlik qiladi. Ba'zan bunday kimsalarning ishi yurishib turgani bilan gunohi, ziyon-zahmati bir kun kelib yuzaga chiqadi.

Alloh taolo Baqara surasi, 172-oyatida bunday marhamat qiladi: «Ey iymon keltirganlar! Allohgagina ibodat qiluvchi bo'lsangiz, sizlarga Biz rizq qilib bergan pokiza narsalardan eb, Unga shukr qilingiz!» Mo'min kishi hamisha halol mehnat bilan rizq topishi, uni tanovul qilganida Allohga shukr qilishi lozim. Bunday inson bu dunyoda ham, oxiratda baxt-saodat topadi.

Darvoqe, bir odamni bilaman. Masjidimizga kelib, bir chekkada xokisorgina o'tiradi va namozdan so'ng uzoq duo qiladi. Bir kuni shu odam: “Bugun o'g'limning imtihoni bor, bir duo qiling”, dedi iymanibgina. Mahallaning oqsoqollari bilan birgalashib duo qildik. Haligi kishi xursand bo'lib ketdi. Biroz vaqt o'tib yana shu kishi: “Sizlarga ming rahmat, domla, duolaringiz ijobat bo'lib o'g'lim o'qishga kirdi”, deb quvondi. “Mashaalloh, ajoyib bo'pti, ilmi yanayam ziyoda bo'lsin, biror kasbning boshini tutib, yurtimizga xizmat qilsin”, dedik. So'ng biroz gurunglashib qoldik...

U olis qishloqdan kelib, mardikorlik qilarkan. Ertalabdan kechgacha halol mehnat qilib, oilasini moddiy jihatdan ta'minlar, o'sib-ulg'ayib kelayotgan bolalarini qo'shimcha fanlarga o'qitarkan. O'zganing haqiga hech xiyonat qilmabdi. Har zamon oilasi davrasida farzandlariga halol mehnatning noni shirinligi, birovning moliga ko'z olaytirish yaxshi emasligi, har doim qayerda bo'lsangiz ham Alloh taoloning roziligini o'ylab ish tutish kerakligi xususida nasihatlar beradi.

Yaqinda to'ng'ich o'g'li Nizomiy nomidagi Toshkent Davlat pedagogika universitetiga byudjet asosida o'qishga kirdi. Hudo xohlasa, qolgan uchoviniyam o'qitaman, deydi. Hullas, maza qilib gurunglashdik. Bilasizmi, shu odam farzandlarining ketma-ket o'qishga kirganini, kattalari esa, ta'limning keyingi bosqichiga o'tganini aytib, bolalarcha quvonib keladi. Biz esa, u kishining ezgulikka limmo-lim suhbatlaridan to'ymaymiz, qo'shilib xursand bo'lamiz va duolar qilamiz. Hullas, biz uning gurungini maza qilib eshitishga odatlandik. Nega? Halollik, poklik kishining baxtiga sabab bo'lishini shu kishi misolida ko'rdik. Bunday odamlar oramizda ko'p.

Rasululloh sollallohu alayhi va sallam hadislarining yana birida: “Hech kim qo'l mehnati bilan topgan taomidan ko'ra yaxshiroq narsa egan emas. Albatta, Allohning payg'ambari Dovud (alayhissalom) ham qo'l mehnati orqali kun ko'rganlar”, deb marhamat qilganlar (Imom Buxoriy rivoyati).

Ha, halol mehnat kishini ulug'laydi. Nonini shirin, barakali qiladi. Payg'ambarlar zarur kasb-kor bilan shug'ullanib, bizga ibrat bo'lganlar. Shuning uchun farzandlarimizga halol kasb-hunar o'rgatishimiz, mehnat – baxt kaliti ekanligini anglatishimiz lozim. Shundagina ular tinchlik, omonlik va farovonlikda yashaydi, dunyo va oxirat saodatiga musharraf bo'ladi.

Abdurahmon ASQAROV,

Chilonzor tumanidagi “Katta Qozirabot” jome masjidi imom-xatibi.

Maqolalar
Boshqa maqolalar
Yangiliklar

Xalqaro anjuman ishtirokchilari Hakim Termiziy maqbarasini ziyorat qildilar

20.11.2026   83060   1 min.
Xalqaro anjuman ishtirokchilari Hakim Termiziy maqbarasini ziyorat qildilar

Bugun, 20 noyabr kuni Termiz shahrida o‘tkazilgan «Hakim Termiziy ilmiy-ma’naviy merosining bugungi kundagi ahamiyati» mavzusidagi xalqaro konferensiya ishtirokchilari buyuk mutafakkir majmuasida bo‘ldilar.

Xorijiy davlatlardan tashrif buyurgan muftiylar, taniqli ulamo va islomshunos olimlar hamda mahalliy soha vakillari muqaddas qadamjoda Qur’oni karim tilovat qilib, ulug‘ muhaddis va mutasavvif haqlariga duoi fotiha o‘qidilar. Butun dunyoda tinchlik-osoyishtalik barqaror bo‘lishi, yurtimiz yanada obodlashib, ajdodlarga munosib avlodlar yetishib chiqishini so‘rab xayrli duolar qilindi.

Mehmonlar mahobatli maqbara, serfayz hovli hamda majmuada amalga oshirilgan keng ko‘lamli bunyodkorlik ishlari bilan yaqindan tanishdilar.

Ular O‘zbekistonda diniy-ma’rifiy sohadagi islohotlar va allomalar merosiga ko‘rsatilayotgan yuksak ehtiromga yuqori baho berdilar.

O‘zbekiston musulmonlari idorasi Matbuot xizmati

O'zbekiston yangiliklari