Uyga kech qaytar ekanman, ko'chamizda, darvoza yoniga o'rnatilgan supachada o'tirgan onamni ko'rib, jahlim chiqib ketdi: “Oyi, yana kutib o'tiribsizmi? Necha marta aytaman. Meni kutmang, men sizga yosh bola emasman”. Onam esa, xotirjam ovozda: “Kelganingga shukr, endi tinch uxlayman. Kelganingni ko'rmagunimcha ko'zimga uyqu kelmaydi. Uzoqdan kelayotganingni ko'rib, ko'nglim xotirjam bo'ladi”. O'sha kuni onamga jahl qilib, ovqat ham emadim.
Bu holat tez-tez takrorlanar edi. Mening asosiy hayotiy tashvishlarim yaxshi ish topish, yaxshi daromad, umuman olganda yaxshi yashash. Ammo onamning men to'g'rimda qayg'urishlari tashvishlar ro'yxatining oxirida edi.
Uylandim, farzandlik bo'ldim, turmush o'rtog'im kuta-kuta uxlab qolar, ammo onamning ko'ziga uyqu kelmasdi. Kechalari uyga kech qaytishlar yoki umuman kelmaslikni oddiygina “hayot tashvishlari” yoki “tirikchilik”, deb, umr qanday o'tganini bilmay qolibman.
Hozir sochlarimga oq oralagan. Darvozamiz o'zgargan, ammo supa o'sha-o'sha. Supada o'tirib, uzoqqa termulaman. “O'g'limni uzoqdan ko'rsam, ko'nglim xotirjam bo'ladi...”.
Munira ABUBAKIROVA
Buyuk Britaniyaning “Woolf Institute” va Kembridj universiteti delegatsiyasi Toshkent, Samarqand va Buxoro shaharlarida bo‘lib, O‘zbekistonning dinlararo totuvlik va vijdon erkinligini ta’minlash borasidagi tajribasi bilan tanishdi, deb xabar bermoqda “Dunyo” AA.
O‘zbekistonning Buyuk Britaniyadagi elchixonasi ma’lumotlariga ko‘ra, Toshkent shahrida Din ishlari bo‘yicha qo‘mita va Musulmonlar idorasi vakillari bilan uchrashuvlar o‘tkazildi. Mehmonlarga diniy sohada amalga oshirilayotgan islohotlar, tolerantlik va konfessional hamjihatlikni mustahkamlash, yoshlarni yot va radikal g‘oyalardan himoya qilish borasida ko‘rilayotgan chora-tadbirlar haqida so‘zlab berildi.
Delegatsiya, shuningdek, Toshkentdagi Islom sivilizatsiyasi markaziga, Samarqand va Buxoro shaharlaridagi tarixiy obidalar hamda ziyoratgohlarga tashrif buyurdi.
Kembridj shahrida joylashgan “Woolf Institute” yahudiylik, xristianlik va islom dinlari o‘rtasidagi o‘zaro anglashuv, akademik tadqiqotlar hamda dinlararo muloqotni rivojlantirishga ixtisoslashgan.
Institut ijroiya direktori doktor Ester-Miriam Vagner O‘zbekiston Markaziy Osiyoning yuragi ekani, mintaqaning boy islom merosini bog‘lab turishini qayd etib, yosh mamlakatning optimizmi va keng ko‘lamli rejalari g‘arb davlatlari uchun ham namuna bo‘la olishini ta’kidladi.
Institut a’zosi, “Edmond de Rothschild Capital Holdings” sobiq bosh direktori Rik Sofer safar davomida madrasa talabalari va o‘qituvchilari bilan suhbatlarda diniy radikalizm alomatlarini sezmaganini bildirdi. Uning so‘zlariga ko‘ra, yahudiy sifatida u uchun Samarqand sinagogalarida tazyiqlar haqida hech qanday shikoyat eshitmagani muhim ahamiyatga ega. U Buyuk Britaniya va Yevropa vakillarini O‘zbekistonning birdamlik va o‘zaro hurmatni ta’minlash borasidagi tajribasini o‘rganishga chaqirdi.
Kembridj universiteti tadqiqotchisi doktor Aliya Abdukadir Ali O‘zbekistonda xotin-qizlar huquqlarini himoya qilish tizimi uni lol qoldirganini aytdi. U Toshkentdagi Zangiota va Buxorodagi Qizbibi ziyoratgohlarida asrlar davomida buyuk ayollar xotirasi e’zozlanib kelinayotganiga e’tibor qaratdi.
Ushbu tashrif O‘zbekistonning dinlararo totuvlik sohasidagi to‘plagan tajribasini xalqaro hamjamiyatga yetkazish hamda Buyuk Britaniya bilan ilmiy-ma’rifiy, madaniy va gumanitar hamkorlikni yanada rivojlantirish yo‘lidagi muhim qadam bo‘ldi.
O‘zbekiston musulmonlari idorasi Matbuot xizmati