O'zbekiston vakillari birinchi "Umra va ziyorat" xalqaro forumida qatnashdi
Shu yil 22 aprel' kuni Saudiya Arabistonining Madina shahrida birinchi "Umra va ziyorat" xalqaro forumi o'z ishini boshladi, deb xabar qilmoqda "Dunyo" AA muxbiri.
Saudiya Arabistoni Haj va Umra vazirligi tomonidan tashkil etilgan anjumandan maqsad "Vision 2030" dasturini hayotga tadbiq etish doirasida Makka va Madinaga tashrif buyuruvchi ziyoratchilar va sayyohlar uchun yanada keng qulayliklar va shart-sharoitlarni yaratishdan iborat.
Tadbirda dunyoning 100 dan ziyod mamlakatdan kelgan delegatsiyalar, jumladan, 300 dan ortiq umra xizmatini tashkil etuvchi sayyohlik agentliklari, mehmonxona, oziq-ovqat va aviakompaniyalar vakillari ishtirok etmoqda. Shuningdek, forum ishida O'zbekiston Bosh konsulxona xodimlari ham qatnashdi.
Anjumanning ochilish qismida Saudiya Arabistoni haj va umra vaziri, doktor Tavfiq ar-Robiya va Madina amiri Salmon bin Sulton bin Abdulaziz Ol Saud ishtirokchilarni qutladi.
Forum doirasida turizm industriyasini rivojlantirish, xorijiy mehmonlarni qabul qilishda yaratilgan shart-sharoitlar, qulay viza tizimi, sayyohlik yo'nalishlarini diversifikatsiya qilish, sayyohlar xavfsizligini ta'minlash va boshqa mavzularda taqdimotlar o'tkazilmoqda.
O'zbekiston Bosh konsulxonasi xodimlari Saudiya Arabistoni Haj va Umra vazirligi, "Al Rajhi Group" korporatsiyasi va "Marmara Group" kompaniyasi vakillari bilan ikki tomonlama uchrashuv o'tkazdilar.
Muzokaralar chog'ida o'zbekistonlik ziyoratchilarga yaratilayotgan shart-sharoitlar uchun minnatdorlik bildirilib, "Umra – 2025" mavsumida o'zaro hamkorlikni yanada rivojlantirish istiqbollari muhokama qilindi.
Birinchi "Umra va ziyorat" xalqaro forumi 24 aprelga qadar davom etdi.
O'zbekiston musulmonlari idorasi
Matbuot xizmati
"Imom Buxoriy" ordeni — yuksak ehtirom ramzi!
Kuni kecha mamlakatimiz mustaqilligining 35 yilligi munosabati bilan muhtaram Prezidentimiz tomonidan yuksak davlat mukofotlariga sazovor bo‘lgan bir guruh vatandoshlarimiz taqdirlandi.
Eng quvonchlisi shuki, tadbirda diniy-ma’rifiy sohada fidokorona xizmat qilib kelayotgan, xalqimizning ma’naviy yuksalishiga beqiyos hissa qo‘shayotgan taniqli ulamolarimiz va faxriylarimizning zahmatli mehnatlari yuksak darajada e’tirof etildi!
Xususan, Diniy idora tizimida uzoq yillardan beri samarali xizmat qilib kelayotgan ustozlardan O‘zbekiston musulmonlari idorasi raisining birinchi o‘rinbosari Homidjon domla Ishmatbekov, O‘zbekiston musulmonlari idorasi Faxriylar kengashi raisi Shayx Abdulaziz Mansur, Samarqand viloyati Payariq tumani "Imom al-Buxoriy" jome masjidi faxriy imomi Mahmudjon domla Ibodullayev, Buxoro viloyati Kogon tumani "Bahouddin Naqshband" jome masjidi imom-xatibi Abdug‘ofur domla Razzoqov "Imom Buxoriy" ordenini Davlatimiz Rahbaridan qabul qilib olishdi.
Ustozlarning ilmiy-ma’rifiy faoliyati, xalq ichida ma’rifat ulashishdagi fidoyiliklari davlatimiz tomonidan yuksak qadrlangani butun diniy-ma’rifiy sohada mehnat qilayotganlar uchun katta faxr va sharafdir.
Ushbu voqea Yangi O‘zbekistonda diniy-ma’rifiy sohaga, milliy qadriyatlarimizni avaylab-asrash hamda rivojlantirishga qaratilayotgan izchil va xayrli siyosatning amaliy ifodasidir.
Xalqimizda qadimdan ma’rifat ahlini ulug‘lash, ularning zahmatli mehnatini qadrlash ezgu an’ana sanaladi. Islom ta’limotida ham ilm egalariga alohida maqom va hurmat bilan qaraladi. Zero, Imom Termiziy bobomiz rivoyat qilgan hadisi sharifda: «Ulamolar payg‘ambarlarning merosxo‘rlaridir», deyilgan.
Ulamolarga ko‘rsatilayotgan bunday e’tiborning nechog‘li xayrli ekani quyidagi hikmatda ham o‘z ifodasini topgan. Ulug‘ zotlardan biri Tovus rahmatullohi alayh otasidan quyidagicha rivoyat qilgan: «To‘rt kishini hurmat qilish sunnatdir: olim, yoshi ulug‘ inson, podshoh va ota» (Imom Abdurazzoq rivoyati).
Mazkur yuksak mukofot milliy va diniy qadriyatlarimizni tiklash, Islom ma’rifatini keng targ‘ib etish, jamiyatda bag‘rikenglik va tinchlik-omonlikni bardavom saqlash yo‘lidagi ko‘p yillik xayrli xizmatlarning munosib e’tirofidir.
Davlatimizning bunday e’tibori diniy soha xodimlariga yanada ulkan mas’uliyat yuklaydi, ma’naviy yuksalish yo‘lidagi xayrli xizmatlar ko‘lamini yanada kengaytirishga xizmat qiladi, insha Alloh.
O‘zbekiston musulmonlari idorasi Matbuot xizmati
- «
- »