Ro'za va sog'lik
Alloh taolo inson zotini nima amalga buyurgan bo'lsa, hammasida inson uchun foydalar bor. Asosiy maqsad Allohning rizoligini topib, U Zotning rahmatiga etishishdir.
Masalan, tahorat olgan kishi pokiza bo'lgani bois kasallik yuqtiruvchi bakteriyalardan omon bo'ladi. Tanasini suv yuvib turgani bois qon aylanishi faollashadi. Namoz o'qish bo'g'inlarda tuz yig'ilishiga qarshilik qiladi, qon aylanishini yaxshilaydi. Zakot berish kishiga o'zining qilgan ishidan mamnunlik bag'ishlab kayfiyatini ko'taradi, yurak kasalliklaridan, xafaqonlikdan asraydi. Hajga borgan odam uzoq yo'lni yayov bosib o'tadi. Bir joyda o'tiravergan kishining ichiga yillar davomida shumlik, sershubhalik, badgumonlik va shularga o'xshash illatlar yig'ilib qoladi. Yo'l yurgan inson esa o'zi sezib-sezmay ana shu illatlardan xalos bo'lib, engil tortib qoladi.
Ro'zaning foydalari haqida tibbiyot mutaxassislari bunday deydi: immunitetni ko'taradi, semirishga monelik qiladi, buyrakda tosh yig'ilishidan saqlaydi, to'qimalarda to'planib qoladigan zaharli moddalardan tozalashga yordam beradi, shahvoniy maylni kamaytiradi, qon tomirlari torayishining oldini oladi, qon aylanishini faollashtiradi, qon bosimi ortishiga qarshilik qiladi, yurakning atrofini yog' qoplab qolishiga yo'l qo'ymaydi, bo'g'inlar shishi qaytishiga foyda beradi, ichak yallig'lanishiga, bavosil, zotiljam, bronxial astma, allergiya, ekzema, qand, saraton, tutqanoq, parishonxotirlik, o'pka va jigar kasalliklari, kamqonlikka qarshi kurashishda foyda beradi.
Bu foydaning bir jihati ignaterapiyaga ham o'xshaydi. Ignaterapiyaning mohiyati faol ishlab turgan hujayralarni igna sanchish bilan harakatdan to'xtatib qo'yib, yalqovlanib, o'lish arafasiga kelib qolgan hujayralarni ishlashga majbur qilish ekan. Ro'zada ham odam och yurgani bois tanasiga o'n bir oy davomida yig'ilib qolgan ortiqcha yog'lar erib ishlatilib ketar ekan-da, odamning jismi ortiqcha yuklardan qutulib engillashib qolar, o'sha yog'larning ostida o'limini kutib yotgan bechora hujayralar yana faol ishlab ketar ekan.
Ana bizga Rabbimizning buyuk marhamati!
Robiya JO'RAQULOVA tayyorladi.
Tarixni buzib ko‘rsatmaslik uchun
Vazirlar Mahkamasi huzuridagi Imom Buxoriy xalqaro ilmiy-tadqiqot markazida "Islom ma’rifati, hadis ilmi va Imom Buxoriy merosi" o‘quv kursi o‘tkazildi. Mutaxassislar tomonidan yodgorlik majmuasi gid-ekskursovodlari uchun o‘tkazilgan mashg‘ulotlar doirasida ekskursiya faoliyati bilan bog‘liq huquqiy, nazariy va amaliy masalalar ko‘rib chiqildi, xabar bermoqda “Samarkandskiy vestnik” nashri.
- Bu yerga tashrif buyurgan har bir ziyoratchi faqat ibodat qilish uchun emas, balki ma’naviy "oziq" olish uchun ham borishi kerak, - deydi Imom Buxoriy xalqaro ilmiy-tadqiqot markazi direktori Sh.Ziyodov. - Bu yerda faoliyat yuritayotgan gidlarning malakasini oshirish tizimini yo‘lga qo‘yar ekanmiz, ularga Imom Buxoriyning bizga qoldirgan merosini, bu merosning tarixiy manbalarini chuqur o‘rgatishimiz shart.
Kurs doirasida majmuaga birinchi marta tashrif buyurgan mehmonlar bilan muloqotning o‘ziga xos xususiyatlari muhokama qilindi. Xorijlik ziyoratchilarga nafaqat Imom al-Buxoriy hayotidagi faktlar va diniy qadriyatlarimizni yetkazish, balki boy madaniy merosimizni asrab-avaylash va yetkazish kabi dolzarb masalalar ko‘tarildi.
Gid-ekskursovodlar ham o‘z tajribalari bilan o‘rtoqlashib, kelgusidagi ishlarni tashkil etish bo‘yicha takliflar berdilar. Bu bevosita ekskursiyalarni o‘tkazish paytida yuzaga keladigan masalalarni muhokama qilish imkonini berdi.
Kurs O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita, Diniy ta’lim sohasida kadrlar malakasini oshirish va qayta tayyorlash instituti, Imom Buxoriy xalqaro ilmiy-tadqiqot markazi, viloyat hokimligi hamda Imom Buxoriy yodgorlik majmuasini saqlash va uning atrofini obodonlashtirish departamenti tomonidan tashkil etildi.
Tarixiy obidalar va ziyoratgohlar turizm salohiyatining muhim qismi bo‘lgan Samarqand viloyati uchun malakali mutaxassislarni tayyorlash alohida ahamiyatga ega. Mehmonga tashrif buyuriladigan joyning tarixi qanchalik to‘liq va tushunarli ochib berilishi gidning professionalligiga bog‘liq. Shuning uchun ham gid-ekskursovodlarning malakasini muntazam oshirib borish, ularning kasbiy bilim va ko‘nikmalarini takomillashtirish hamda zamonaviy xizmat ko‘rsatish standartlarini joriy etish Samarqandda turizm xizmatlari sifatini oshirishda ustuvor yo‘nalishlardan biri bo‘lib qolmoqda.
O‘zbekiston musulmonlari idorasi Matbuot xizmati
- «
- »