Sufyoni Savriy rahmatullohi alayh Rasululloh sollallohu alayhi vasallamning avlodlaridan bo'lmish Imom Ja'far Sodiq rahmatullohi alayhning huzurlariga borib: “Menga nasihat qilmaguningizcha yoningizdan ketmayman”, dedi.
Men sizga nima ko'proq foyda keltirsa, shuni aytaman, ey Sufyon, deb Imom Ja'far quyidagi uchta hikmatli nasihatlarini bayon qildi:
1. Agar Alloh sizga biror narsani bergan bo'lsayu, uni davomli va barqaror bo'lishini istasangiz, bu in'omi uchun Allohga ko'proq hamd va shukr ayting. Darhaqiqat, Alloh taolo o'z Kitobida: “Qasamki, agar shukr qilsangiz, albatta, sizga ziyoda qilurman”, degan (Ibrohim, 7).
2. Agar rizqingiz kechiksa, gunohlaringiz uchun Allohga tez-tez istig'for ayting. Zero, Alloh taolo: “Bas, o'z Robbingizga istig'for ayting, albatta, U gunohlarni ko'plab mag'firat qiluvchidir, dedim. U zot osmondan ustingizga ketma-ket baraka yomg'irini yuboradir”, deb marhamat qilgan (Nuh, 10-12).
3. Va agar biror narsa sizni xafa qilgan bo'lsa, unda “Allohdan boshqada kuch va qudrat yo'qdir” – “Laa havla va laa quvvata illa billah” so'zini ko'p takrorlang, chunki bu so'z jannat xazinalaridan, xursandchilik va engillik kalitidir”.
Shunda Sufyon: “Bu uch nasihat naqadar ajoyib-a”, dedi.
Abu Abdulloh Ja'far ibn Muhammad hijriy 83, milodiy 700 yili Madinada tug'ilgan. Nasablari ota tomondan Hazrati Aliga, ona tomonidan esa Abu Bakr Siddiq roziyallohu anhumga boradi. Taba' tobe'inlardan, ahli baytning eng taniqli ulamolaridan, tafsir, hadis, fiqh ilmlaridan tashqari kimyo, fizika, hisob kabi tabiiy ilmlarda ham peshqadam bo'lganlar. Ba'zi manbalarga ko'ra Abu Hanifa va Imom Molikning ham ustozi bo'lganlar. Hijriy 148, milodiy 765 yili vafot etgan. Qabrlari Baqi' qabristonida, otalari Muhammad Boqir, bobolari Zaynulobidin, katta amakilari Imom Hasan yonlariga dafn etilgan.
Sufyoni Savriy hijriy 97, milodiy 716 yil Kufada tug'ilib, hijriy 161, milodiy 778 yil vafot etgan. Abu Abdulloh Sufyon ibn Sa'id ibn Masruq Savriy Kufiy, u zotning to'liq ismi sharifi hisoblanadi. Mujtahid, hadis bo'yicha mo'minlar amiri unvoniga ega, “Al-jome'” kitobi muallifi, ilmiga amal qiluvchi, o'z zamonasidagi olimlarning sayyidi bo'lgan. Sufyoni Savriy Rasululloh sollallohu alayhi vasallamning o'n ettinchi bobolari Ilyos ibn Muzarning chevarasi Savr ibn Abdumanot avlodiga mansub bo'lgani uchun “Savriy” deyiladi!
Abu Nuaymning "Hilyatul avliyo”, Zirikliyning "Al-A'lom" asarlari asosida TII Hadis va Islom tarixi fanlari kafedrasi katta o'qituvchisi Po'latxon KATTAYeV tayyorladi.
Bugun, 20 noyabr kuni Termiz shahridagi Imom Termiziy xalqaro ilmiy-tadqiqot markazida buyuk alloma tavalludining 1200 yilligiga bag‘ishlangan «Hakim Termiziy ilmiy-ma’naviy merosining bugungi kundagi ahamiyati» mavzusidagi xalqaro ilmiy konferensiya bo‘lib o‘tmoqda.
Qur’oni karim tilovati bilan boshlangan tadbirning ochilish marosimida Surxondaryo viloyati hokimi Ulug‘bek Qosimov, Prezident Administratsiyasi mas’ul xodimi Ergash Daminov, Din ishlari bo‘yicha qo‘mita raisi o‘rinbosari Davron Maxsudov, O‘zbekiston musulmonlari idorasi raisining birinchi o‘rinbosari Homidjon domla Ishmatbekov hamda Qirg‘iziston Islom akademiyasi rektori Ermamat Ergeshov so‘zga chiqdilar.
Anjumanda O‘zbekiston, Malayziya, Misr, Qirg‘iziston, Italiya, Suriya va Afg‘oniston kabi mamlakatlardan 50 dan ziyod xorijiy va mahalliy olim va islomshunos mutaxassislar qatnashmoqda.
Ochilish marosimida Homidjon domla Ishmatbekov allomaning «Xatm al-avliyo», «Navodir al-usul» kabi yuzdan ortiq nodir asarlarida ilgari surilgan qalb pokligi, nafs tarbiyasi va hadis hikmatlariga oid g‘oyalar bugungi globallashuv davrida yot oqimlarga qarshi kurashish hamda yoshlar tarbiyasida mustahkam ma’rifiy asos ekanini ta’kidladi. Shuningdek, yurtimizda Islom sivilizatsiyasi markazi va ilmiy-tadqiqot markazlarining tashkil etilishi, Hakim Termiziy majmuasining obod qilinishi buyuk ajdodlar merosini tiklash yo‘lidagi islohotlar samarasi ekani qayd etildi.
Yalpi majlisda O‘zbekiston, Malayziya, Misr va Qirg‘izistonning yetakchi olimlari Hakim Termiziy asarlarini zamonaviy ilm-fan asosida o‘rganish va xalqaro ilmiy hamkorlikni kuchaytirish yuzasidan ma’ruzalar qildilar.
Ayni paytda anjuman «Islom sivilizatsiyasi rivojida Hakim Termiziy maktabi» hamda «Hakim Termiziy ma’naviy merosi – zamonaviy global tahdidlarga yechim» nomli ikki sho‘bada davom etmoqda. Ularda olimlarning o‘ttizdan ortiq ma’ruzalari tinglanib, yakunda ilmiy taklif va tavsiyalar ishlab chiqiladi.
O‘zbekiston musulmonlari idorasi Matbuot xizmati