Aqidada tanzih (Alloh taoloni aybu nuqsonlardan pok deb bilish) bobi
Ahli sunna val-jamoa aqidasiga ko'ra, mutlaq komillik Alloh taologa xosdir, U Zotida ham, sifatlarida ham, fe'llarida ham maxluqotlariga hech bir jihatdan o'xshamaydi va barcha aybu nuqsonlardan pokdir. Mana shunday e'tiqod qilish har bir mukallaf (oqil va balog'atga etgan kishiga) farzi ayn hisoblanadi.
Alloma Abul Muzaffar Tohir ibn Muhammad al-Isfiroyiniy (vaf. 471-hijriy.) “At-Tabsir fid-din”nomli asarida aytadi:
“Yana bilishingiz lozimki, al-Qodim (mavjudligining boshlanishi yo'q bo'lgan Zot Alloh) subhanahu va taolo jism ham emas, javhar ham emas. Chunki jism eng kichik zarralarning biriktirilishi ila hosil bo'ladi, (bunda biriktiruvchiga muhtojlik bor). Javhar esa (o'zi eng kichik zarra bo'lib), uni bir-biriga biriktirish va yopishtirish joiz hisoblanadi. Har bir ana shunday xususiyatga ega bo'lgan narsaning chegarasi va nihoyasi bo'ladi. Darhaqiqat, (har bir chegarali va nihoyali narsa uni ana shu maxsus miqdor bilan belgilagan va xoslagan zotga muhtoj bo'lishi e'tiboridan) Alloh taolo uchun chegara va nihoya mumkin bo'lmagan muhol ishdir.
Alloh taolo jismning sifatini zikr qilgan oyatida u ziyodalikni qabul qilishini aytadi:
“Va (Alloh taolo) uni (ya'ni Tolutni) ilmda va jismda kenglik jihatidan ziyoda qildi” (Baqara, 247-oyat). Ushbu oyatdan nimayiki jism bo'lsa, unga ziyodalik va nuqson joiz bo'lishi ayon bo'ladi. (Bu esa har qanday jism uni maxsus miqdor bilan belgilovchi va xoslovchi zotga muhtoj bo'lishini keltirib chiqaradi). Alloh taolo uchun ziyodalik va nuqson joiz emas”. (159-b.) Zero, Uning O'zi maxluqotlarini ziyoda va nuqsonli qiluvchidir. Aks holda U ham maxluqotlarga o'xshash bo'lib qolar edi. Alloh taolo bundan pokdir.
Mir Arab oliy madrasasi o'qituvchisi
Asrorxon Mahmudov.
"Imom Buxoriy" ordeni — yuksak ehtirom ramzi!
Kuni kecha mamlakatimiz mustaqilligining 35 yilligi munosabati bilan muhtaram Prezidentimiz tomonidan yuksak davlat mukofotlariga sazovor bo‘lgan bir guruh vatandoshlarimiz taqdirlandi.
Eng quvonchlisi shuki, tadbirda diniy-ma’rifiy sohada fidokorona xizmat qilib kelayotgan, xalqimizning ma’naviy yuksalishiga beqiyos hissa qo‘shayotgan taniqli ulamolarimiz va faxriylarimizning zahmatli mehnatlari yuksak darajada e’tirof etildi!
Xususan, Diniy idora tizimida uzoq yillardan beri samarali xizmat qilib kelayotgan ustozlardan O‘zbekiston musulmonlari idorasi raisining birinchi o‘rinbosari Homidjon domla Ishmatbekov, O‘zbekiston musulmonlari idorasi Faxriylar kengashi raisi Shayx Abdulaziz Mansur, Samarqand viloyati Payariq tumani "Imom al-Buxoriy" jome masjidi faxriy imomi Mahmudjon domla Ibodullayev, Buxoro viloyati Kogon tumani "Bahouddin Naqshband" jome masjidi imom-xatibi Abdug‘ofur domla Razzoqov "Imom Buxoriy" ordenini Davlatimiz Rahbaridan qabul qilib olishdi.
Ustozlarning ilmiy-ma’rifiy faoliyati, xalq ichida ma’rifat ulashishdagi fidoyiliklari davlatimiz tomonidan yuksak qadrlangani butun diniy-ma’rifiy sohada mehnat qilayotganlar uchun katta faxr va sharafdir.
Ushbu voqea Yangi O‘zbekistonda diniy-ma’rifiy sohaga, milliy qadriyatlarimizni avaylab-asrash hamda rivojlantirishga qaratilayotgan izchil va xayrli siyosatning amaliy ifodasidir.
Xalqimizda qadimdan ma’rifat ahlini ulug‘lash, ularning zahmatli mehnatini qadrlash ezgu an’ana sanaladi. Islom ta’limotida ham ilm egalariga alohida maqom va hurmat bilan qaraladi. Zero, Imom Termiziy bobomiz rivoyat qilgan hadisi sharifda: «Ulamolar payg‘ambarlarning merosxo‘rlaridir», deyilgan.
Ulamolarga ko‘rsatilayotgan bunday e’tiborning nechog‘li xayrli ekani quyidagi hikmatda ham o‘z ifodasini topgan. Ulug‘ zotlardan biri Tovus rahmatullohi alayh otasidan quyidagicha rivoyat qilgan: «To‘rt kishini hurmat qilish sunnatdir: olim, yoshi ulug‘ inson, podshoh va ota» (Imom Abdurazzoq rivoyati).
Mazkur yuksak mukofot milliy va diniy qadriyatlarimizni tiklash, Islom ma’rifatini keng targ‘ib etish, jamiyatda bag‘rikenglik va tinchlik-omonlikni bardavom saqlash yo‘lidagi ko‘p yillik xayrli xizmatlarning munosib e’tirofidir.
Davlatimizning bunday e’tibori diniy soha xodimlariga yanada ulkan mas’uliyat yuklaydi, ma’naviy yuksalish yo‘lidagi xayrli xizmatlar ko‘lamini yanada kengaytirishga xizmat qiladi, insha Alloh.
O‘zbekiston musulmonlari idorasi Matbuot xizmati
- «
- »