Chor atrofda ko'kalamzoru, daraxtlar yashnab turadigan jannatmakon yurtimizning ko'chalarini kezib borar ekansiz, tabiatning go'zalligidan dilingiz yashnab ketadi. Kimlardir eta olmagan kunga etib kelganingiz uchun qalbingizda shukrona tuyg'ulari qanot qoqa boshlaydi. Borliq turfa ranglarga burkanib, kamalakning maftunkor ranglaridek tovlanib, jilva qiladi.
Yana sahni chaman bo'ldi munaqqash rang gullardan,
Magarkim sun'ining naqqoshig'a rang imtihonidur.
Zahiriddin Muhammad Bobur
So'ng nogahon ko'zingiz qiyg'os gullagan mevali daraxtlarning gullari to'kilib ona zamin bag'riga tushganini ilg'ab qoladi. Falsafa iboralariga ko'ra o'sha meva gulining uzilib tushishi tarix hisoblanadi. Shu bilan o'sha gulning tushishi tarixga aylandi. Ariqlardagi zilol suvlar ham mavj urib oqar ekan tarix sahifalarini to'ldirib boraveradi.
Har safar qadam bosar ekanmiz, har bir bosgan qadamlarimiz tarixga aylanib, moziy qa'riga sho'ng'iy boradi Biz yana qadam tashlashimiz mumkin, ammo bu safargisi yangi qadam, avvalgi qadamlar esa o'tmishga aylanib bo'lganidek, keyingi qadamni qo'yishimiz bilanoq bu qadamlarimiz ham tarixga bitilaveradi.
Biz istaymizmi, istamaymizmi qanchalik kelajakka talpinganimiz sari har bir soniyamiz, har bir nafasimiz o'tmish girdobiga kirib boradi. Hademay o'zimiz ham tarixga aylanamiz. Shunday ekan, o'tkinchi bu dunyoda garchi jismimiz tarixlarda makon topsa-da ma'naviyatimiz, amalimiz kelajak sari to'xtamay oldinga intilishi uchun ertaga topilmas, ammo bugun biz etarlicha qadr qilmaydigan imkoniyatlarimizdan foydalanishimiz zarur. Hamyurtimiz Zahiriddin Muhammad Bobur aytganidek:
Bor elg'a yaxshiliq qilg'ilki, mundin yaxshi yo'q ‒
Kim, degaylar dahr aro qoldi falondin yaxshiliq.
Ana o'shanda bizni kelajak avlod doimo hurmat bilan eslab, kerak bo'lsa yurgan yo'llarimizdan andozalar olsinlar. Ularning xotiralarida hamisha yaxshilik timsoli bo'lib qolaylik. Ertangi kunda biz shunday maqomni topishimiz uchun esa bugungi g'animat hayotlik chog'imizda bizdan avvalgi ajdodlarimiz xotirasidan ibrat olmog'imiz kerak bo'ladi.
Ulug'bek qori YO'LDOShYeV,
Asaka tumanidagi “Muhammadsolih hoji” jome masjidi xodimi.
Ko‘hna va hamisha navqiron Samarqand yana xayrli tashabbuslar va samarali hamkorlik maydoniga aylandi. Shu yil 18 noyabr kuni buyuk muhaddis Imom Buxoriy majmuasida o‘tgan XIV «Global Waqf» xalqaro anjumani doirasida vaqf tizimini rivojlantirishga qaratilgan qator muhim uchrashuvlar va rasmiy kelishuvlar amalga oshirildi.
Muzokaralarning eng muhim natijasi sifatida «Vaqf» xayriya jamoat fondi, Malayziyaning Xalqaro Vaqf Faoliyati Kengashi (iWAQF) hamda Malayziya Xalqaro Islom Universiteti (IIUM) o‘rtasida uch tomonlama hamkorlik memorandumi imzolandi. Ushbu hujjat vaqf sohasida ta’lim va ilmiy-amaliy loyihalarni qo‘llab-quvvatlash, akademik almashinuvni yo‘lga qo‘yish, maxsus o‘quv modullarini yaratish va malakali kadrlar tayyorlashga keng yo‘l ochadi.
Shu bilan birga, Zayniddin domla Eshonqulov Birlashgan Arab Amirliklarining Islom ishlari, vaqflar va zakot bo‘yicha Bosh vakolatli organi delegatsiyasi hamda Turkiya Diyonat vaqfi vakili Salmon Oqtosh bilan ikki tomonlama muloqotlar o‘tkazdi. Samimiy uchrashuvlarda vaqf mulklarini zamonaviy usullarda samarali boshqarish, xayriya faoliyatini takomillashtirish va kelgusidagi qo‘shma loyihalarni amalga oshirish istiqbollari yuzasidan aniq fikr almashildi.
Xalqaro muloqotlar ahamiyatiga to‘xtalgan Malayziyaning O‘zbekistondagi elchixonasi vakili Arhan Shoh Anvar ilgari Malayziya, Turkiya va Marokashda o‘tkazilgan ushbu konferensiya bu gal Samarqandda tashkil etilganidan mamnunligini bildirdi. U Prezident farmoni bilan yurtimizda islom moliyasi joriy etilayotgan davrda mazkur anjuman ikki hafta avval o‘tgan Samarqand islom moliyasi konferensiyasining mantiqiy davomi ekanini, xorijiy tajriba almashinuvi esa ummat ravnaqi va O‘zbekiston manfaatlariga xizmat qilishini e’tirof etdi.
Uchrashuvlar yakunida tomonlar esdalik sovg‘alari almashib, xorijiy delegatsiyalar Imom Buxoriy majmuasini ziyorat qildilar hamda buyuk muhaddisning ilmiy-ma’naviy merosi va majmuadagi bunyodkorlik ishlari bilan yaqindan tanishdilar.
O‘zbekiston musulmonlari idorasi Matbuot xizmati