Cavol: Tasbih namozi haqida o'qib qoldim. Uning o'qilish tartibini aytib bersangiz.
Javob: Bismillahir Rohmanir Rohiym. Bu namoz mashhur nafl namozlar sirasiga kiradi va nafl namoz o'qish mumkin bo'lmagan vaqtlarda o'qilmaydi.
To'rt rakat o'qiladi. Ikki rakatdan bo'lib-bo'lib, ikki marta ham o'qish mumkin. Chunki har rakatda 75 ta, to'rt rakatda 300 ta tasbih aytilishi kerak.
Zam surada istagan surani o'qish mumkin. Agar bilsa, birinchi rakatga “Takosur”, ikkinchiga “Asr”, uchinchiga “Kofirun”, to'rtinchiga “Ixlos” surasini o'qiydi.
Bu namozning o'qilish kayfiyatini Alloma Ibn Obidin rahimahulloh quyidagicha bayon qilgan:
“Tasbih namozi bir yoki ikki salom bilan o'qilib, unda uch yuz marta “Subhanallohi valhamdu lillahi valaa ilaha illallohu vallohu akbar” ni aytadi. Bir rakatda etmish besh marta aytadi.
Quloq qoqib sanoni o'qigandan keyin o'n besh marta aytadi. Keyin “A'uzu”, “Basmala”, “Fotiha” va zam surani o'qigandan keyin o'n marta, rukuda o'n marta, rukudan qaytganda o'n marta, birinchi sajdada o'n marta, sajdadan qaytib o'tirganda o'n marta, ikkinchi sajdada o'n marta aytiladi.
Mazkur tasbehni ruku va sajdada “Subhana Robbiyal a'la” va “Subhana Robbiyal a'ziym”ni aytgandan keyin o'n marta aytadi. Bu kayfiyatni Imom Termiziy Abdulloh ibn Muborakdan rivoyat qilganlar. “Qunya” kitobida ham shu kayfiyat aytilgan va ulamolar tomonidan ixtiyor qilingan so'z mana shu degan” (“Raddul muhtor” kitobi).
Mana shu tartibda to'rt rakat o'qiladi va jami uch yuz tasbih aytilgan bo'ladi.
Agar shu namozda sajdai sahv vojib bo'lib qolib, sajdai sahv qilsa, mazkur sajdada tasbihlarni aytmaydi, balki sajdaning o'zining tasbihlari bilan kifoyalanadi.
Agar qaysidir joydagi tasbihni tashlab ketgan bo'lsa, boshqa o'rinda bo'lsa ham o'shani o'qib qo'yiladi. Masalan, birinchi sajdadagi o'n tasbihni o'qimagan bo'lsa, oradagi jalsada emas, ikkinchi sajdadagi tasbihlarga qo'shib o'qib qo'yadi.
Bir qancha hadisi shariflarda tasbih namozi fazilatlari aytilib, uni o'qigan inson gunohlardan forig' bo'lishi, imkoni bo'lsa har kuni, bo'lmasa, haftada, oyda, yilda, buni ham qila olmasa, umrda bir marta bo'lsa ham qilishga targ'ib qilingan.
Tasbih namozida tasbihlar o'qish borasida boshqa ko'rinishlar ham bor. Ko'pchilik ulamolar ma'qullagan ko'rinishni keltirishni afzal deb bildik. Vallohu a'lam.
O'zbekiston musulmonlari idorasi Fatvo markazi
Ko‘hna va hamisha navqiron Samarqand yana xayrli tashabbuslar va samarali hamkorlik maydoniga aylandi. Shu yil 18 noyabr kuni buyuk muhaddis Imom Buxoriy majmuasida o‘tgan XIV «Global Waqf» xalqaro anjumani doirasida vaqf tizimini rivojlantirishga qaratilgan qator muhim uchrashuvlar va rasmiy kelishuvlar amalga oshirildi.
Muzokaralarning eng muhim natijasi sifatida «Vaqf» xayriya jamoat fondi, Malayziyaning Xalqaro Vaqf Faoliyati Kengashi (iWAQF) hamda Malayziya Xalqaro Islom Universiteti (IIUM) o‘rtasida uch tomonlama hamkorlik memorandumi imzolandi. Ushbu hujjat vaqf sohasida ta’lim va ilmiy-amaliy loyihalarni qo‘llab-quvvatlash, akademik almashinuvni yo‘lga qo‘yish, maxsus o‘quv modullarini yaratish va malakali kadrlar tayyorlashga keng yo‘l ochadi.
Shu bilan birga, Zayniddin domla Eshonqulov Birlashgan Arab Amirliklarining Islom ishlari, vaqflar va zakot bo‘yicha Bosh vakolatli organi delegatsiyasi hamda Turkiya Diyonat vaqfi vakili Salmon Oqtosh bilan ikki tomonlama muloqotlar o‘tkazdi. Samimiy uchrashuvlarda vaqf mulklarini zamonaviy usullarda samarali boshqarish, xayriya faoliyatini takomillashtirish va kelgusidagi qo‘shma loyihalarni amalga oshirish istiqbollari yuzasidan aniq fikr almashildi.
Xalqaro muloqotlar ahamiyatiga to‘xtalgan Malayziyaning O‘zbekistondagi elchixonasi vakili Arhan Shoh Anvar ilgari Malayziya, Turkiya va Marokashda o‘tkazilgan ushbu konferensiya bu gal Samarqandda tashkil etilganidan mamnunligini bildirdi. U Prezident farmoni bilan yurtimizda islom moliyasi joriy etilayotgan davrda mazkur anjuman ikki hafta avval o‘tgan Samarqand islom moliyasi konferensiyasining mantiqiy davomi ekanini, xorijiy tajriba almashinuvi esa ummat ravnaqi va O‘zbekiston manfaatlariga xizmat qilishini e’tirof etdi.
Uchrashuvlar yakunida tomonlar esdalik sovg‘alari almashib, xorijiy delegatsiyalar Imom Buxoriy majmuasini ziyorat qildilar hamda buyuk muhaddisning ilmiy-ma’naviy merosi va majmuadagi bunyodkorlik ishlari bilan yaqindan tanishdilar.
O‘zbekiston musulmonlari idorasi Matbuot xizmati