Abu Hurayra roziyallohu anhudan rivoyat qilinadi. Rasululloh sollallohu alayhi vasallam bunday dedilar: “Kimki mo'mindan dunyo g'amlaridan bir g'amni aritadigan bo'lsa, Alloh qiyomat kunidagi g'amlardan bir g'amni undan aritadi” (Imom Muslim, Abu Dovud, Termiziy, Nasoiy va Ibn Moja rivoyati).
Ma'lum bo'ladiki, kimda-kim “Alloh taolo qiyomat kuni kulfat va g'amlarimni aritsin”, desa, u musulmonlarning g'amlarini aritishda jonbozlik qilishi darkor! Umuman, har bir musulmon ushbu hadisdan nasihat olib, odamlarga yordam berishga, ularning og'irini engil qirishga urinmog'i lozim!
Boshqa bir hadisda Rasululloh sollallohu alayhi vasallam aytadilar: “Kim bir musulmon(ning gunohi)ni yashirsa, Alloh u(ning gunohi)ni dunyoda ham, oxiratda ham yashiradi”.
Islom dini har bir musulmonni boshqalarning gunohini yopishga undaydi, zotan, biz insonmiz, hammamiz ham xato qilamiz, gohida bandachilik qilib gunohga qo'l urib qo'yamiz. Lekin, odamlar orasida gunoh ishning yoyilishiga, tarqalishiga sababchi bo'lib qolmasligimiz kerak. Buning yo'li – boshqalarning gunohini yopishimizdadir, shunda Alloh dunyo va oxiratda bizning ham gunohlarimizni yopgay!
Quyidagi satrlar, nasihatlar buyuk ulamolarimizdan bugunga qadar naql qilib kelinadi:
“Boshqaning g'amini aritishing g'aming arishiga sabab bo'ladi!
Gunohlaring yashirilishini istasang, boshqalarning gunohini yashir!
Boshqalarga yordam bersang, Alloh senga yordam beradi!”
Rasululloh sollallohu alayhi vasallam bunday dedilar: “Modomiki, banda birodarining yordamida bo'lar ekan, Alloh taolo uning yordamida bo'ladi”.
Bu nabaviy ko'rsatmadan o'rganadiganimiz – musulmon kishi barcha ishlarida Alloh taoloning yordamiga erishishining yo'li boshqalarga yordam berish bilan shug'ullanishida ekan. Alloh taoloning borliqda joriy qilgan odatlaridan biri – ko'rinishidan boshqa uchun qilgan amalingiz aslida o'zingiz uchun bo'ladi va bu orqali sizga Alloh taolo tomonidan tavfiq beriladi.
Doktor Hasson Shamsi Poshoning “Metin qoyalar” kitobidan
G'iyosiddin Habibulloh, Ne'matulloh Isomov tarjimasi.
Shu yilning 3 sentyabridan 28 noyabriga qadar Qatarning Doha shahridagi Islom san’ati muzeyida “O‘zbekiston: boqiy meros” nomli yirik xalqaro ko‘rgazma bo‘lib o‘tmoqda.
Davlatimiz rahbari tashabbusi bilan Madaniyat va san’atni rivojlantirish jamg‘armasi tomonidan tashkil etilgan ushbu nufuzli tadbirda yurtimizdagi 7 ta muzeyga tegishli 152 ta noyob tarixiy ashyo bilan bir qatorda O‘zbekiston musulmonlari idorasi kutubxonasi fondida saqlanayotgan bebaho xazina – Katta Langar Qur’onining sahifasi ham namoyish etilmoqda.
Mazkur mas’uliyatli jarayonga tayyorgarlik puxta olib borildi. Xususan, O‘zbekiston musulmonlari idorasi raisi, muftiy shayx Nuriddin Xoliqnazar hazratlari ushbu Mus'hafning xavfsizligini ta’minlash, kelajak avlodga bezavol yetkazish va xalqaro ko‘rgazmada munosib taqdim etish yuzasidan muhim ko‘rsatmalar berdilar. Shuningdek, bu tarixiy qadam yurtimiz va boy islomiy merosimiz targ‘ibotida manfaatli bo‘lishini tilab, xayrli duolar qildilar. Diniy idora raisining birinchi o‘rinbosari Homidjon domla Ishmatbekov esa tashkiliy-tayyorgarlik ishlarini muvofiqlashtirib, Dohaga yo‘l olgan vakillarimizni kuzatib qo‘ydilar.
Shundan so‘ng Diniy idora Kutubxona bo‘limi xodimlari Doha shahriga yetib borib, xalqaro mutaxassislar bilan hamkorlikda Mus'haf sahifasini namoyishga har jihatdan tayyorladilar va ko‘rgazma zalidagi maxsus himoyalangan jihozga joylashtirdilar.
Ko‘rgazmaga tashrif buyurayotgan xorijiy olimlar, san’atshunoslar va ko‘plab mehmonlar Islom tamaddunining betakror durdonasi sanalmish Katta Langar Qur’oni sahifasini katta qiziqish va ehtirom bilan tomosha qilmoqdalar. Tadbir ishtirokchilari bu bebaho obidaning asrlar osha butunligicha asrab-avaylab kelinayotganini yuksak baholab, O‘zbekistonning boy diniy-ma’rifiy merosi hamda xalqimizning islom sivilizatsiyasi rivojiga qo‘shgan ulkan hissasini alohida e’tirof etmoqdalar.
O‘zbekiston musulmonlari idorasi Matbuot xizmati