Saudiya nashrlari ziyoratchilarimizga bo'lgan e'tiborni keng yoritdi
Saudiya Arabistonida eng faol bo‘lgan madina.com, alriyadh.com, al-spa.gov.sa, shahdnow.sa, nabd.com, newsi.gulf, arab.sahafahh.net, 2lkhbr.com kabi nashrlar o‘zbekistonlik ziyoratchilarni Toshkent hamda Madina shaharlaridagi kuzatish va kutib olish tadbirlarida yuksak hurmat-ehtirom ko‘rsatilgani haqida qator xabarlarni e’lon qildi.
Mazkur xabarlarda bo‘lg‘usi hojilarni kuzatish uchun Din ishlari bo‘yicha qo‘mita, O‘zbekiston musulmonlari idorasi rahbariyati hamda mutasaddilar Toshkent xalqaro aeroportida jam bo‘lgani va xayrli duolar qilinganiga alohida e’tibor qaratilgan.
Shuningdek, Madina shahriga yetib kelgan ziyoratchilarimizni “Haj – 2024” ishchi guruhi rahbarlari va mutasaddilar tomonidan katta ehtirom bilan kutib olingani va ularga iltifotlar ko‘rsatilgani e’tirof etilgan. Mazkur xabarda ziyoratchilar respublikamizning 10 ta hududiy xalqaro aeroporti orqali Madina shahriga kuzatilayotgani ham qayd etilgan.
Ushbu arab nashrlari mamlakatimizda Yurtboshimiz boshchiligida haj tadbirlariga katta e’tibor qaratilib, mo‘min-musulmonlarning haj arkonini mukammal ado etishlari uchun barcha imkoniyatlar hozirlangani va bundan bo‘lg‘usi hojilar ham minnatdor ekaniga urg‘u qaratilgan.
Ma’lumot o‘rnida, “Ar-Riyoz” gazetasi 1965 yilda ta’sis etilgan bo‘lib, 52 sahifali kunlik nashrdir. U 150 000 adadda chop etiladi, alriyadh.com nomli sayti esa eng mashhur elektron nashrlardan biri hisoblanadi. Bir kunda o‘rtacha 1,5 mln. kishi sayt ma’lumotlarini mutolaa qiladi.
O‘zbekiston musulmonlari idorasi Matbuot xizmati
Bir guruh diniy-ma’rifiy soha fidoyilariga "O‘zbekiston Respublikasi mustaqilligining 35 yilligi" esdalik nishonlari topshirildi
27 avgust kuni O‘zbekiston Respublikasi mustaqilligining 35 yilligi munosabati bilan diniy-ma’rifiy sohada samarali mehnat qilib kelayotgan fidoyi yurtdoshlarimizni taqdirlashga bag‘ishlangan tantanali tadbir bo‘lib o‘tdi.
Tadbirda O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov kirish so‘zi bilan ishtirok etdi.
Kirish nutqida mamlakatimizda mustaqillik yillarida, ayniqsa, so‘nggi yillarda diniy-ma’rifiy sohani rivojlantirish, jamiyatda tinchlik-totuvlik, millatlararo hamjihatlik va diniy bag‘rikenglikni mustahkamlash borasida amalga oshirilayotgan islohotlar, shuningdek, sohada faoliyat yuritayotgan ulamolar, imom-xatiblar, mudarrislar va fidoyi xodimlarning munosib hissasi haqida alohida ta’kidlandi.
Tantanali tadbir davomida diniy-ma’rifiy sohada ko‘p yillardan buyon samarali mehnat qilib, yurtimizda ma’naviy barqarorlikni ta’minlash, yosh avlodni milliy va umuminsoniy qadriyatlar ruhida tarbiyalash, aholi o‘rtasida ma’rifiy tushuntirish ishlarini olib borishga munosib hissa qo‘shib kelayotgan bir guruh fidoyi yurtdoshlarga "O‘zbekiston Respublikasi mustaqilligining 35 yilligi" esdalik nishonlari tantanali ravishda topshirildi.
Esdalik nishonlarini topshirish marosimida O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov, Din ishlari bo‘yicha qo‘mita raisi Sodiq Toshboyev, O‘zbekiston musulmonlari idorasi raisi, muftiy Shayx Nuriddin Xoliqnazar hazratlari, O‘zbekistondagi Islom sivilizatsiyasi markazi direktori Firdavs Abduhalikov, O‘zbekiston Respublikasi Vazirlar Mahkamasi mas’ul xodimi Orifxon Zokirovlar ishtirok etdilar.
Taqdirlash marosimida ta’kidlanganidek, mazkur esdalik nishoni mamlakatimiz taraqqiyotiga, uning tinchligi va barqarorligiga, jamiyatda millatlararo totuvlik va diniy bag‘rikenglik muhitini mustahkamlashga, yosh avlodni milliy va umuminsoniy qadriyatlar ruhida tarbiyalashga munosib hissa qo‘shayotgan fidoyi insonlarga bildirilgan yuksak ehtirom va e’tirof ramzidir.
Tadbir yakunida taqdirlanganlar o‘zlariga bildirilgan yuksak ishonch va e’tibor uchun minnatdorlik bildirib, mamlakatimiz tinchligi va ravnaqi yo‘lidagi ezgu faoliyatlarini yanada sidqidildan davom ettirishlarini ta’kidladilar.
Barcha mukofot sohiblarini samimiy muborakbod etamiz!
Mustaqilligimizning 35 yilligi muborak bo‘lsin!
O‘zbekiston musulmonlari idorasi Matbuot xizmati
