Hojilarimiz ma'rifiy suhbatlardan mamnun bo'lmoqda
Shu yil 3 iyun' kuni Makka shahridagi Abroj Dana mehmonxonasida farg'onalik ziyoratchilar bilan ma'rifiy suhbat bo'lib o'tdi. Unda O'zbekiston musulmonlari idorasi raisi o'rinbosari Muhammadolim domla Muhammadsiddiqov, “Qur'on va tajvidni o'rgatish” bo'limi mudiri Shayx Alijon qori Haydarov, Fatvo markazi direktor o'rinbosari G'ulomiddin domla Holboyev hamda ellikboshi va ziyoratchilar ishtirok etdi.
Ulamolarning haj ibodati va odoblari, komil mo'minning axloqi va ajdodlarimizning ibratli hayotlari asosidagi suhbatidan ziyoratchilar bahramand bo'ldi.
Bunday muloqotlar Sirdaryo viloyatidan tashrif buyurgan ziyoratchilar uchun ham tashkil etilmoqda. Navbatdagi ana shunday suhbatda Toshkent shahridagi “Siroj Solih” masjidi imom-xatibi Hasan domla Qodirov sirdaryolik hojilarga hajning arkonlari haqida mav'iza qilib berdi.
4 iyun' kuni Andijon viloyat bosh imom-xatibi Mirzamaqsud domla Alimov Makka shahrida bo'lib turgan ziyoratchilar bilan ma'rifiy uchrashuv o'tkazdi. Unda Mirzamaqsud domla ziyoratchilarga shukronalik hissi, vaqtning qadriga etish, ibodat masalalari kabi mavzularda go'zal ma'ruzalar qilib berdi.
Mazkur ma'rifiy suhbatlarda ziyoratchilar o'zlarini qiziqtirgan savollarga javob oldilar. Shuningdek, minglab xatmi Qur'onlar bag'ishlanib, xayrli duolar qilindi.
Bunday ma'rifiy suhbatlar davom etmoqda. 
O'zbekiston musulmonlari idorasi
Matbuot xizmati
"Imom Buxoriy" ordeni — yuksak ehtirom ramzi!
Kuni kecha mamlakatimiz mustaqilligining 35 yilligi munosabati bilan muhtaram Prezidentimiz tomonidan yuksak davlat mukofotlariga sazovor bo‘lgan bir guruh vatandoshlarimiz taqdirlandi.
Eng quvonchlisi shuki, tadbirda diniy-ma’rifiy sohada fidokorona xizmat qilib kelayotgan, xalqimizning ma’naviy yuksalishiga beqiyos hissa qo‘shayotgan taniqli ulamolarimiz va faxriylarimizning zahmatli mehnatlari yuksak darajada e’tirof etildi!
Xususan, Diniy idora tizimida uzoq yillardan beri samarali xizmat qilib kelayotgan ustozlardan O‘zbekiston musulmonlari idorasi raisining birinchi o‘rinbosari Homidjon domla Ishmatbekov, O‘zbekiston musulmonlari idorasi Faxriylar kengashi raisi Shayx Abdulaziz Mansur, Samarqand viloyati Payariq tumani "Imom al-Buxoriy" jome masjidi faxriy imomi Mahmudjon domla Ibodullayev, Buxoro viloyati Kogon tumani "Bahouddin Naqshband" jome masjidi imom-xatibi Abdug‘ofur domla Razzoqov "Imom Buxoriy" ordenini Davlatimiz Rahbaridan qabul qilib olishdi.
Ustozlarning ilmiy-ma’rifiy faoliyati, xalq ichida ma’rifat ulashishdagi fidoyiliklari davlatimiz tomonidan yuksak qadrlangani butun diniy-ma’rifiy sohada mehnat qilayotganlar uchun katta faxr va sharafdir.
Ushbu voqea Yangi O‘zbekistonda diniy-ma’rifiy sohaga, milliy qadriyatlarimizni avaylab-asrash hamda rivojlantirishga qaratilayotgan izchil va xayrli siyosatning amaliy ifodasidir.
Xalqimizda qadimdan ma’rifat ahlini ulug‘lash, ularning zahmatli mehnatini qadrlash ezgu an’ana sanaladi. Islom ta’limotida ham ilm egalariga alohida maqom va hurmat bilan qaraladi. Zero, Imom Termiziy bobomiz rivoyat qilgan hadisi sharifda: «Ulamolar payg‘ambarlarning merosxo‘rlaridir», deyilgan.
Ulamolarga ko‘rsatilayotgan bunday e’tiborning nechog‘li xayrli ekani quyidagi hikmatda ham o‘z ifodasini topgan. Ulug‘ zotlardan biri Tovus rahmatullohi alayh otasidan quyidagicha rivoyat qilgan: «To‘rt kishini hurmat qilish sunnatdir: olim, yoshi ulug‘ inson, podshoh va ota» (Imom Abdurazzoq rivoyati).
Mazkur yuksak mukofot milliy va diniy qadriyatlarimizni tiklash, Islom ma’rifatini keng targ‘ib etish, jamiyatda bag‘rikenglik va tinchlik-omonlikni bardavom saqlash yo‘lidagi ko‘p yillik xayrli xizmatlarning munosib e’tirofidir.
Davlatimizning bunday e’tibori diniy soha xodimlariga yanada ulkan mas’uliyat yuklaydi, ma’naviy yuksalish yo‘lidagi xayrli xizmatlar ko‘lamini yanada kengaytirishga xizmat qiladi, insha Alloh.
O‘zbekiston musulmonlari idorasi Matbuot xizmati
- «
- »