Cavol: Masjidi Nabaviyda bomdod namozida imom zam suraga sajda oyati bor surani o'qidi. Sajda oyatini o'qib, tilovat sajdasini qilish uchun takbir aytib sajdaga ketdi. Biz ruku qilyapti deb rukuga ketdik. Imom yana takbir aytib sajdadan qaytdi. Surani tugatib, ruku qildi. Biz ham qo'shilib ruku qildik va shu tarzda imom bilan birga namozni o'qib tugatdik. Imom bilan tilovat sajdasini qilmaganimiz, ortiqcha ruku qilganimiz sababli namoz buzilmaydimi?
Javob: Bismillahir Rohmanir Rohiym. Ikki harami sharifda ko'p hollarda imomlar juma kuni bomdod namozida “Sajda” surasini zam sura qiladi. Bu surada sajda oyati bor. Savolda aytilgandek imomlar sajda oyati kelganda takbir aytib sajdaga borib, sajda qilib, yana tik turadi. Haj yoki umraga borayotgan ziyoratchilar shuni bilib olmog'i lozim.
Savolda so'ralgan holatga kelsak, bu holatda namoz buzilmaydi. Bilmasdan tilovat sajdasi qilinmagani uchun gunoh ham bo'lmaydi. Ataylab sajda qilinmasa, bunda gunoh bo'ladi. Ulamolar farz amallarda imomga ergashmaslik namozni buzadi deyishgan. Lekin sizning holatingizda barcha farz amallar imom bilan birga bajarilgan. Faqat ortiqcha ruku qilingan. Bu namozni buzmaydi. Bu haqida fiqhiy kitoblarimizda bunday deyilgan:
“Namoz farz amallarda imomga xilof qilish bilan buziladi. Hilof qilish degan gapdan murod imomga butunlay ergashmaslikdir. Namoz imomga ergashmaslik tufayli emas, balki farz amalni tark qilish sababli buziladi. Namozning buzilishi farz amalga xosdir. Chunki vojib yoki sunnatda imomga iqtido qilmaslik bilan namoz buzilmaydi”(“Raddul muhtor” kitobi).
Sajdai tilovat qilish vojib amal bo'lib, vojib amalni bajarmagani sababli namoz buzilmaydi.
Kitobdagi iboradan imomga iqtido qilganda vojib yoki sunnat amalni bajarmasa bo'lar ekan, degan xayolga bormaslik kerak. Chunki qasdan vojib yoki sunnatni tark qilish namozni buzmasa-da, gunohkorlikka olib boradi. Vallohu a'lam.
O'zbekiston musulmonlari idorasiFatvo markazi
Yangi O‘zbekiston taraqqiyot yo‘lining 10 yilligi munosabati bilan joriy yilning 18–20 noyabr kunlari O‘zbekiston delegatsiyasi Iordaniya Hoshimiylar Podshohligida bo‘lib, ilmiy-ma’rifiy tadbirlar, ikki tomonlama uchrashuvlar va kitob taqdimotlarida ishtirok etadi.
Safar davomida Ammon shahridagi nufuzli tashkilotlar, ilmiy markazlar va oliy o‘quv yurtlari bilan hamkorlikda podshohlikning milliy kutubxonalari hamda oliy ta’lim muassasalarida «Yangi O‘zbekiston kitob burchaklari» tashkil etiladi. Shuningdek, ushbu maskanlarda Davlatimiz Rahbarining arab tiliga tarjima qilingan asarlari hamda keng ko‘lamli islohotlarga bag‘ishlangan kitob-albomlar taqdimoti o‘tkaziladi.
Shu bilan birga, Iordaniya jamoatchiligi vakillari, ziyolilar, ilm-fan namoyandalari, ulamolar hamda din va davlat arboblari ishtirokida «Yangi O‘zbekiston fenomeni»ning 10 yilligiga bag‘ishlangan xalqaro anjuman-taqdimot bo‘lib o‘tadi.
Tadbirlar doirasida mamlakatimiz vakillari bilan Iordaniyaning diniy-ma’rifiy tashkilotlari rahbarlari va akademik muassasalar yetakchilari o‘rtasida ikki tomonlama uchrashuvlar o‘tkazilishi ham rejalashtirilgan.
O‘zbekiston musulmonlari idorasi Matbuot xizmati