1. Rasululloh sollallohu alayhi vasallam Qurbon hayiti kuni g'usl olardilar.

Ibn Abbos roziyallohu anhumodan rivoyat qilinadi: “Rasululloh sollallohu alayhi vasallam Ramazon hayiti kuni va Qurbon hayiti kuni g'usl qilar edilar”(Ibn Moja rivoyati).

 

1. Rasululloh sollallohu alayhi vasallam Qurbon hayitida qurbonlik qilishdan oldin hech narsa emasdilar.

Burayda roziyallohu anhu aytadilar: “Nabiy sollallohu alayhi vasallam Fitr kuni taomlangunlaricha (fitr namoziga) chiqmas edilar va Qurbonlik kuni namoz o'qigunlaricha taomlanmas edilar”(Imom Termiziy rivoyati).

 

1. Rasululloh sollallohu alayhi vasallam masjidga piyoda yurib borardilar.

Abu Rofe' roziyallohu anhudan rivoyat qilinadi: “Rasululloh sollallohu alayhi vasallam ikki hayit namoziga piyoda chiqar edilar”(Ibn Moja rivoyat qilgan).

 

1. Masjidga ketishda Allohni zikr qilardilar.

Ibn Umar roziyallohu anhumodan rivoyat qilinadi: “Nabiy sollallohu alayhi vasallam to namozgohga borgunlaricha takbir aytar edilar” (Imom Hokim rivoyati).

 

1. Hayit namozidan oldinnafl namoz o'qimas edilar.

Abu Sa'id Hudriy roziyallohu anhu aytadilar: “Rasululloh sollallohu alayhi vasallam hayit namozidan oldin hech narsa o'qimas edilar, manzillariga qaytganlarida ikki rakat namoz o'qir edilar” (Ibn Moja rivoyat qilgan).

 

1. Masjidga bir yo'ldan borib, boshqa yo'ldan qaytar edilar.

Jobir roziyallohu anhudan rivoyat qilinadi: “Nabiy sollallohu alayhi vasallam hayit kuni (borish va qaytish) yo'llarini boshqa-boshqa qilar edilar”(Imom Buxoriy rivoyati).

 

1. Hayit namozidan so'ng qurbonlik qilardilar.

Baro ibn Ozib roziyallohu anhudan rivoyat qilinadi. Rasululloh sollallohu alayhi vasallam: “Kim namozdan oldin kurbonlik qilsa, u o'ziga qo'y so'yibdi. Kim namozdan keyin so'ysa, kurbonligini mukammal qilibdi va musulmonlarning sunnatini topibdi”, dedilar (Imom Buxoriy, Imom Muslim rivoyati).

 

Alloh taolo barchamizni har bir ishda Nabiy sollallohu alayhi vasallamga egashuvchilardan qilsin!

 O'zbekiston musulmonlari idorasi Matbuot xizmati