Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.

Bir kishi Abu Bakr Siddiq roziyallohu anhuni haqorat qildi. Rasululloh sollallohu alayhi vasallam ham o‘sha yerda edilar. Abu Bakr roziyallohu anhu u kishiga hech narsa demadi. Rasululloh sollallohu alayhi vasallam bundan ajablanib, tabassum qilib o‘tirdilar. Haligi kishi so‘kishni haddan oshirganidan so‘ng Abu Bakr roziyallohu anhu bir narsa deb unga javob qaytardi. Rasululloh sollallohu alayhi vasallam achchiqlanib turib ketdilar. Shunda Abu Bakr roziyallohu anhu Rasululloh sollallohu alayhi vasallamning ortlaridan borib so‘radi:

- Ey Allohning Rasuli! U meni so‘kkanida o‘tirdingiz, ammo men javob qaytarganimda g‘azablanib turib ketdingiz?!

Nabiy alayhissalom dedilar:

- Bir farishta sen bilan birga bo‘lib, haligi so‘kkan kishiga javob qaytarib turgan edi. Sen javob qaytarishni boshlaganingda farishta ketib, shayton keldi. Men shayton bilan bir joyda o‘tirmayman!

So‘ngra yana dedilar:

- Uchta narsa haqdir: zulm ko‘rgan kishi zulmga sabr etsa, Alloh uning izzatini oshiradi; bir banda kishilarga saxovat qilsa, Alloh uning molini yanada ko‘paytiradi; kim tilanish eshigini ochsa, Alloh unga faqirlik eshigini ochadi!

Agar bir kishini o‘z axloq darajangizga ko‘tarishga kuchingiz yetmasa, hech bo‘lmaganda uning axloqi darajasiga tushmang. Pastkash insonga qarshi uning quroli bilan kurashsangiz, u bilan teng bo‘lib qolasiz. Shallaqini shallaqilik bilan qaytarish ham shallaqilikdir. Agar fazilat sohibi janjal qilib pastkashlar kabi tubanlikka tushsa, bu zaminda fazilat sohiblari qolmagan bo‘lardi!

Mark Tven aytadi: «Ahmoqlar bilan tortishma. Chunki ular seni oldin o‘zlarining darajalariga tushirib olib, so‘ngra osonlik bilan yengishadi!».

Inglizlarning ham shunga yaqin maqoli bor: «Cho‘chqa bilan balchiqda olishma. Aks holda, sen rasvo bo‘lasan, u esa maza qiladi. Zero, ifloslik uning hayot uslubidir!».

Biz oldimizda bo‘layotgan har qanday janjalga aralashavermasligimiz lozim.

Birov chaqirsa, urushga qo‘shilib ketaverishimiz to‘g‘ri emas. Shunday janglar borki, faqat unga qo‘shilmagan odamgina g‘alaba qozonadi!

O‘zingizni bilmaslikka soling, ko‘z yuming. Zero, o‘zni bilmaslikka solish payg‘ambarlar xulqidandir.

«Yusuf buni ko‘ngliga tugib qo‘ydi. Ularga oshkor qilmadi!»

Imom Ahmad rohimahulloh aytadi:

«Ofiyatning o‘ndan to‘qqizi o‘zni bilmaslikka solishdadir».

Imom Shofi’iy rohimahullohning gapidan shoir Abu Tamom o‘zining quyidagi baytiga ilhom olgan:

«Ahmoq kishi qavmiga oqsoqol bo‘la olmaydi. Ammo qavmning oqsoqoli o‘zini ba’zan ahmoqlikka sola olishi kerak!».

«Nabaviy tarbiya» kitobi asosida tayyorlandi