Qozonda Qur'onning eng yaxshi qorilari yig'iladi
Shu yilning 24-26 iyul' kunlari BRIKS tashkilotiga a'zo mamlakatlarning eng yaxshi qorilari Qur'oni karim musobaqasida ishtirok etish uchun Tatariston poytaxti Qozonda yig'iladi.
Tanlovda 20 dan ortiq davlat, xususan, BRIKS davlatlari, arab-musulmon dunyosi, Afrika va MDH davlatlaridan eng kuchli qorilari ishtirok etadi.
22-Halqaro Qur'oni karim musobaqasining faxriy mehmonlari orasida Rossiya, Birlashgan Arab Amirliklari, Eron, Braziliya, Bahrayn, Hitoy, Hindiston, Misr, MDH davlatlari va boshqa davlatlarning vazirlari, muftiylari, taniqli olimlari, shuningdek, xalqaro musulmon tashkilotlari rahbarlari ham bor.
Ma'lumki, 20 yildan buyon Moskvada Qur'on tilovati xalqaro musobaqasi o'tkazib kelinmoqda. Bu yil ham xuddi shunday tadbir Qozon shahrida bo'lib o'tadi.
O'zbekiston musulmonlari idorasi Matbuot xizmati
YUNЕSKO bilan O‘zbekiston mahalla tizimi tajribasini xalqaro darajada targ‘ib qilish masalasi muhokama qilindi
O‘zbekiston va YUNЕSKOning Nomoddiy madaniy merosni muhofaza qilish to‘g‘risidagi konvensiyasi kotibiyati vakillari o‘rtasida onlayn uchrashuv bo‘lib o‘tdi, deb xabar bermoqda “Dunyo” AA.
Mamlakatimizning YUNЕSKO huzuridagi Doimiy vakolatxonasi ko‘magida tashkil etilgan muloqotda mahalla bilan bog‘liq madaniy an’ana va urf-odatlar, ularni xalqaro darajada targ‘ib qilish istiqbollari muhokama qilindi.
YUNЕSKOning Nomoddiy madaniy merosni muhofaza qilish to‘g‘risidagi konvensiyasi kotibi Fumiko Oxinata va Osiyo-Tinch okeani mintaqasi uchun mas’ul dastur mutaxassisi Nikolas Tan mavzu yuzasidan o‘z fikr-mulohazalarini bayon etdi.
O‘zbekiston tomonidan Tashqi ishlar vazirligi, O‘zbekiston mahallalari uyushmasi hamda YUNЕSKO huzuridagi Doimiy vakolatxonasi vakillari mahallaning ko‘p asrlik tarixi, uning jamiyat hayotidagi alohida o‘rni va milliy an’analarni saqlashdagi ahamiyati haqida so‘z yuritdi.
Uchrashuvda mahalla O‘zbekiston xalqi turmush tarzining ajralmas qismi ekani ta’kidlandi. U insonlarni yaxshi qo‘shnichilik, o‘zaro yordam, hamjihatlik va katta avlod vakillariga hurmat tamoyillari asosida birlashtiradi.
YUNЕSKO Kotibiyati vakillari taqdim etilgan materiallarga katta qiziqish bildirdi. Ular O‘zbekistonda mahalla bilan bog‘liq shakllangan jamoat hayoti tartibining o‘ziga xos xususiyatlarini e’tirof etdi.
Suhbat davomida O‘zbekistonning nomoddiy madaniy merosni targ‘ib qilishdagi roli alohida qayd etildi. Shu nuqtayi nazardan, o‘zbek mahalla tizimi tajribasi YUNЕSKO Kotibiyati mutaxassislarida katta qiziqish uyg‘otdi.
O‘zbekiston musulmonlari idorasi Matbuot xizmati