Qalblarni poklash sari: shahvat seni qulga aylantiradi
15. Abu Bakr Siddiq roziyallohu anhudan rivoyat qilinadi. U kishi Alloh taoloning: “Gunohlar quruqlikda va dengizda oshkor bo‘ldi”, degan so‘zi haqida gapirib: “Quruqlik - bu tildir, dengiz esa – bu qalbdir. Qachon til fasod bo‘lsa, unga nafslar yig‘laydi. Qachon qalb fasod bo‘lsa, unga farishtalar yig‘laydi”, dedilar.
Til qachon fasod bo‘ladi? Qachonki tildan chiqayotgan so‘zlar qalb ila tasdiq qilinmasa. Qalb qachon fasod bo‘ladi? Agar uning sohibi gunoh amallarni, harom va shubhali luqmalarni tark etmasa.
Hikmatlarda aytiladiki, kim gunohlarni tark qilsa, uning qalbi yumshoq bo‘ladi va kim haromni tark qilib, haloldan yesa uning fikri sof bo‘ladi.
16. Ulamolar aytadilarki:
“Albatta, shahvat podshohni qulga aylantiradi. Sabr esa qulni podshohga aylantiradi. Siz “Yusuf va Zulayxo” qissasiga qaramaysizmi!?”
Tarixga nazar tashlasak, shahvatiga qul bo‘lib butun mol-dunyosi, obro‘-e’tibori va hatto iymonidan ayrilganlar haqida ko‘plab voqeliklar keltirilgan. Sabr qilganlar esa Allohning inoyati ila horlikdan azizlikka chiqqan! Shahvatini jilovlab, sabrni do‘st bilganlarga Allohning rahmati bo‘lsin!
Saidabror Umarov
Bu hadisni Rasululloh ﷺdan eshitganmisiz?
Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.
Hazrati Muoviyaning davrlarida ikki odam janjallashib qoldi. Janjal asnosida biri boshqasining tishini urib sindirdi. U singan tishini olib, Muoviya roziyallohu anhuning huzurlariga bordi va: «Tishning qasosi tish bo‘ladi, shuning uchun qasos olib bering», dedi.
Hazrati Muoviya: «To‘g‘ri, sening haqqing bor, lekin nima foyda? Sening tishing-ku sinib bo‘ldi. Unikini ham sindiraylikmi? Uning o‘rniga tishingning xunini ol, xun evaziga murosa qil», dedilar.
U kishi: «Men aynan o‘sha tishini sindirib qasos olaman», dedi. Muoviya roziyallohu anhu unga yana qayta tushuntirdilar. Lekin u ko‘nmadi. Hazrati Muoviya keyin: «Undoq bo‘lsa yur, uning ham tishini sindiramiz», dedilar.
Yo‘lda mashhur sahoba Abu Dardo roziyallohu anhu o‘tirgan edilar. U zot shunday dedilar: «Birodar! Qara, sen-ku qasos olyapsan. Lekin bu gapni ham eshitib ket. Men Rasululloh sollallohu alayhi vasallamning: «Kim birovga aziyat yetkazsa va aziyat yetgan kimsa uni kechirib yuborsa, Alloh taolo uni afvga eng ko‘p muhtoj bo‘ladigan kunda (ya’ni oxiratda) afv qiladi», deganlarini eshitganman».
Boyagina g‘azabga minib, xun haqi olishga hech rozi bo‘lmay turgan odam ushbu hadisni eshitgach: «Siz bu hadisni Rasululloh sollallohu alayhi vasallamdan eshitganmisiz?» deb so‘radi. Abu Dardo roziyallohu anhu: «Ha, eshitganman, mening mana shu quloqlarim eshitgan», dedilar.
«Nasihatlar guldastasi» kitobidan