Shu yil sentyabr' oyidan boshlab Malayziyaning “Astro” telekompaniyasi platformalarida jahonga mashhur teleboshlovchi, oshpaz, restavrator va pazandalik bloger Chef Vanning O'zbekistonning turizm va gastronomik salohiyatiga bag'ishlangan mualliflik dasturlari namoyish etilmoqda, deb xabar bermoqda “Dunyo” axborot agentligi.

Teleko'rsatuvlar mamlakatimizning Kuala-Lumpurdagi elchixonasi, O'zbekiston Turizm qo'mitasi va “O'zbekiston havo yo'llari” milliy aviakompaniyasi hamkorligida amalga oshirilgan qo'shma medialoyiha samarasidir.

Toshkent, Samarqand, Buxoro va Hiva shaharlarida turkum teleko'rsatuvlar va pazandachilik mahorat darslarini suratga olish ishlari olib borildi.

Ushbu loyiha O'zbekistonni sayyohlik yo'nalishi sifatida ommalashtirish va o'zbek gastronomik brendlarini xorijda joylashtirish orqali Malayziyadan kelayotgan sayyohlar oqimini ko'paytirishga xizmat qiladi.

Televideniye hikoyalari, shuningdek, 100 milliondan ortiq auditoriyaga ega butun dunyo bo'ylab mashhur striming platformalarida namoyish etiladi.

O'zbekiston musulmonlari idorasi
Matbuot xizmati