Ramazon vaqtlarini qanday o‘tkazaylik?
Qur’oni karimni ko‘p tilovat qiling. Nabiy sallollohu alayhi vasallam o‘zlari Jabroil alayhissalom bilan bir-birlariga galma-galdan Qur’oni karimni o‘qib berar edilar.
- Nafllar va zikrlarni yanada ko‘paytiring.
- Musulmonlarning hojatlari va ehtiyojlarini o‘ylang va ularning g‘amlariga sherik bo‘ling.
- Biror kimsadan ozor yetsa , sabr qiling va o‘zingiz ham hech kimga ozor bermang.
- Biror kimsa siz bilan janjallashishni va behuda tortishishni xohlasa, siz unga “men ro‘zadorman” deng.
- Faxsh so‘zlar, balki behuda so‘zlardan ham o‘zingizni saqlang.
- Muxaqqiq ulamolar nazdida qadr kechasi biror kunga xos emas. Shuning uchun har kechada biroz bo‘lsa ham ibodat qilishga harakat qiling. Toki, agar aynan o‘sha kecha qadr bo‘lsa, u holda bizga o‘sha kechaning barakalaridan ulush nasib etsin.
- Hargiz yolg‘on gapirmang va hech kimni g‘iybat qilmang.
- Nafl ishlarning savobi farzlarga teng bo‘lgani uchun imkon qadar muxtojlarga moliyaviy ko‘mak ham bering.
- O‘z xodimlaringiz va qo‘l ostidagilaringizning ishlari va mas’uliyatlarida yengillik qiling.
- La ilaha illalloh, Muhammadur Rosululloh va istig‘forni ko‘p ayting.
- Jannatni ko‘p so‘rang va jahannamdan ko‘p panoh so‘rang.
- O‘ta ojizlik va xokisorlik ila ko‘p duo qiling.
- Gazetxonlik va hokazo kabi muboh ishlarga ham kamroq vaqt sarflang.
- DVD, TV, Kino ko‘rmang. Shuningdek, radio, magnitafon va hokazolar orqali qo‘shiqlar va behuda narsalar eshitishdan juda qattiq saqlaning.
- Tahajjud, ishroq, choshtgoh, avvobiyn namozlariga xos e’tibor qarating.
- Imkon bo‘lsa butun oxirgi o‘n kunda e’tikofga himmat qiling. Bo‘lmasa qancha imkon bo‘lsa, shuncha e’tikof niyyati ila masjidda o‘tkazing. Ayollar ham o‘z uylarida biror joyni ta’yin qilib, e’tikof o‘tira oladilar. Balki, ular ham himmat qilishlari lozim.
- Bandalarga dinni yetkazish va ularga haqni yetkazishga imkon qadar harakat qiling.
- Nazarni saqlang va nomahramlar ila zaruratsiz gaplashishdan juda qattiq saqlaning.
- Shovqin-suron, baqir-chaqir va ahli-ayolga, shuningdek, qo‘l ostidagilarga zulm va haddan oshishlikdan o‘zingizni saqlang.
“Ahkaame Ramazan”- kitobidan. Mavlono Muhammad Abdulqoviy. 11-bet. Abdulqayyum Komil tarjimasi
“Discover Pakistan” telekanalida O‘zbekistonning ma’naviy-ma’rifiy merosiga bag‘ishlangan ko‘rsatuv namoyish qilindi
Pokistonning ommabop “Discover Pakistan” telekanalida O‘zbekistonda bo‘lib o‘tgan I Xalqaro islom sivilizatsiyasi forumi bag‘ishlangan maxsus ko‘rsatuv efirga uzatildi, deb xabar bermoqda “Dunyo” AA.
Urdu tilida namoyish qilingan mazkur teleloyiha I Xalqaro islom sivilizatsiyasi forumida ishtirok etgan “Discover Pakistan” ijodiy jamoasi tomonidan tayyorlangan.
Unda forumning asosiy natijalari, uning xalqaro ahamiyati va O‘zbekistonning islom sivilizatsiyasi merosini asrab-avaylash va diniy-ma’rifiy sohadagi islohotlari xususida so‘z yuritildi.
Efir davomida forum turli mamlakatlardan kelgan taniqli olimlar, dinshunoslar, davlat va jamoat arboblarini bir maydonga jamlagan nufuzli xalqaro muloqot platformasi sifatida e’tirof etildi. Muallif ta’kidlanganidek, anjuman diniy bag‘rikenglik, millatlararo totuvlik, ma’rifiy islom g‘oyalarini keng targ‘ib qilish, ekstremizm va radikalizmga qarshi ma’naviy-ma’rifiy yondashuvlarni mustahkamlashga qaratilgan dolzarb tashabbuslarni ilgari surdi.
Ko‘rsatuvda O‘zbekiston Prezidenti rahbarligida yurtimizda diniy-ma’rifiy sohada amalga oshirilayotgan keng ko‘lamli islohotlar, buyuk allomalar merosini chuqur o‘rganish, ilmiy tadqiqotlarni qo‘llab-quvvatlash hamda islom madaniyati va sivilizatsiyasiga oid boy merosni xalqaro maydonda targ‘ib etish borasidagi ishlarga alohida e’tibor qaratildi. Samarqand, Toshkent va Termiz kabi ilm-fan markazlarining jahon islom sivilizatsiyasi taraqqiyotida tutgan o‘rni haqida ham batafsil ma’lumot berildi.
Ko‘rsatuvda forum ishtirokchilari bo‘lgan bir qator xorijiy olimlarning intervyulari ham o‘rin olgan. Xorijiy ekspertlar mazkur forum mamlakatlar va turli xalqlar o‘rtasidagi madaniy-gumanitar hamkorlikni yanada mustahkamlash, diniy bag‘rikenglik va o‘zaro hurmat tamoyillarini keng targ‘ib qilishda muhim ahamiyat kasb etganini qayd etdi.
Teledastur boshlovchisi aytganidek, forum doirasida qabul qilingan tashabbuslar xalqaro hamjamiyat tomonidan ijobiy baholanmoqda va ular ilm-fan, ta’lim va madaniy muloqotni rivojlantirishga xizmat qiladi. “O‘zbekistonning ochiq va konstruktiv tashqi siyosati hamda xalqaro muloqot maydonlarini tashkil etish borasidagi sa’y-harakatlari yuksak baholandi”, – deya ta’kidlagan muallif.
“Discover Pakistan” telekanali orqali efirga uzatilgan mazkur ko‘rsatuv Pokiston jamoatchiligini O‘zbekistonning boy ma’naviy-ma’rifiy merosi va I Xalqaro islom sivilizatsiyasi forumining mazmun-mohiyati bilan yaqindan tanishtirishga xizmat qildi.
O‘zbekiston musulmonlari idorasi Matbuot xizmati
